بھارت :بھینس کا گوشت رکھنے پر بھی مسلم خواتین پر تشدد

بھارت میں مودی سرکار نے انتہا پسندوں کو کھلی چھوٹ دے دی ہے، ریاست مدھیا پردیش میں ہندو انتہا پسندوں نے گائے کا گوشت رکھنے کا جھوٹا الزام لگاکر دو مسلمان خواتین کو بدترین تشدد کا نشانہ بنایا،تاہم بعد میں یہ ثابت ہوگیا کہ وہ گائے کا نہیں بلکہ بھینس کا گوشت تھا۔

مودی سرکار کی شہ پر ہندو انتہا پسند آپے سے باہر ہوگئے اور ملک بھر میں گاؤ رکشا کے نام پر مہم شروع کر رکھی ہے، ان انتہا پسندوں کے جو ہاتھ لگ جائے، پھر وہ بچتا نہیں۔

کچھ ایساہی بھارتی ریاست مدھیہ پردیش میں ہوا،جہاں دو مسلمان خواتین کو گائے کا گوشت رکھنے کے الزام پر شدید تشدد کا نشانہ بنایا۔ انتہا پسندوں کے ٹولے میں شامل خواتین نے مسلمان خواتین پر لاتوں، مکوں، تھپڑوں کی برسات کردی۔

اس دوران پولیس خاموش تماشائی بنی نظر آئی، دونوں مسلمان خواتین کو گائے کے گوشت کی اسمگلنگ کے الزام میں گرفتار کیا گیا تھا۔ مدھیا پردیش کے وزیر داخلہ کے مطابق میڈیکل رپورٹ سے ثابت ہوگیا کہ گوشت گائے کا نہیں بلکہ بھینس کا تھا۔