صدر مملکت کا اہلیہ کی خیریت کیلئے نواز شریف کو فون

صدر مملکت ممنون حسین نے سابق وزیر اعظم میاں نواز شریف کو فون کیا ہے۔

صدر ممنون نے میاں نواز شریف سے فون پر ان کی اہلیہ بیگم کلثوم نواز کی خیریت دریافت کی اور دعا کی کہ اللہ تعالیٰ بیگم کلثوم نواز کو جلد صحت اور شفائے کاملہ عطا فرمائے۔

واضح رہے کہ سابق وزیر اعظم میاں نواز شریف کی اہلیہ بیگم کلثوم نواز علاج کے سلسلے لندن گئی ہوئی ہیں جہاں انہیں ڈاکٹروں نے حلق کا کینسر تشخیص کیا ہے۔

بیگم کلثوم نواز کا کینسر ابتدائی مراحل میں اور قابل علاج ہے، جبکہ آج ہی ان کی صاحبزادی نے ٹوئٹر کے ذریعے پیغام میں بتایا ہے کہ ان کا علاج بھی شروع کردیا گیا ہے۔

واضح رہے کہ میاں نواز شریف کی بطور وزیر اعظم نااہلی کے بعد ان کی چھوڑی جانے والی قومی اسمبلی کی نشست این اے 120 سے ضمنی انتخاب کیلئے بیگم کلثوم نواز مسلم لیگ ن کی امیدوار بھی ہیں۔