دنیا بھر میں کم عمر بچوں کے ساتھ زیادتی اور اغوا کے بڑھتے واقعات کو مد نظر رکھتے ہوئے دہلی حکومت نے شہر کے تمام سرکاری اسکولوں میں سی سی ٹی وی کیمرے نصب کرنے کا فیصلہ کیا ہے جس کے بعد والدین گھر بیٹھے دیکھ سکیں گے کہ ان کا بچہ اسکول میں کیا کررہا ہے۔
بھارتی میڈیا کے مطابق وزیر اعلیٰ اروند کیجریوال کا کہنا ہے کہ دہلی کے تمام سرکاری اسکول میں پڑھنے والے بچوں کے والدین اب اس بات سےبے فکر ہوجائیں کہ ان کابچہ اسکول میں کیا کررہا ہےکیونکہ اب وہ براہ راست اپنے بچےکو اسکول میں موجود دیکھ سکیں گےجس کے لیے انہیں اپنے موبائل فون میں ایک ایپ ڈائون لوڈ کرنا ہوگی۔
پچھلے دنوں وزیر اعلی اروند کیجریوال نے ایک تجربہ کیا جس کے کامیاب ہونے کے بعد انہوں نےاس بات کا اعلان کیا کہ تین مہینےکے اندر تمام سرکاری اسکولوں میں کیمرے نصب کر دئیے جائیں گے۔
انہوں نے مزید کہا کہ کیمرے لگتے ہی تمام والدین کو ایک خفیہ ’آئی ڈی‘ فراہم کی جائے گی جس کی مدد سے وہ براہ راست کلاس روم میں جاری سرگرمیاں دیکھ سکتے ہیں۔
اس ایپ میں شکایت درج کرنے کا فیچر بھی موجود ہے۔ اگر والدین کوئی بھی غلط بات ہوتےدیکھ لیں تو وہ باآسانی اپنی شکایت لکھ سکتے ہیں جس کو ایک مخصوص ادارہ نہ صرف دیکھے گا بلکہ اس پرفوری ایکشن بھی لیا جائے گا۔
صرف وزیر تعلیم، سیکرٹری تعلیم اور ڈائریکٹر تعلیم کو اس بات کی اجازت ہوگی کہ وہ کسی بھی وقت اور کسی بھی کلاس روم کوبراہ راست دیکھ سکتے ہیں جبکہ والدین محض اپنے بچوں کی کلاس تک ہی محدد رہ سکیں گے۔
اروند کیجریوال نے بتایا کہ یہ اقدام اٹھانے کی ضرورت انہیں اس وقت پیش آئی جب ایک 5 سالہ بچی کو دہلی کے اسکول میں زیادتی کانشانہ بنایا گیا۔