ماں کی دوسری شادی پر بیٹے کا سوتیلے باپ کیلئے دل کو چھولینے والا پیغام

ایک نوجوان لڑکے کا اپنے سوتیلے باپ کے لیے دل کو چھولینے والا پیغام سوشل میڈیا پر صارفین کی خصوصی توجہ کا مرکز بن گیا ہے۔

سوشل میڈیا پر ایک شادی کی ویڈیو وائرل ہورہی ہے جس میں ایک نوجوان لڑکے کو والدہ کی دوسری شادی کے موقع پر اپنے سوتیلے باپ کے لیے جذباتی تقریر کرتے دیکھا جاسکتا ہے۔

اس ویڈیو میں دیکھا جاسکتا ہے کہ شادی کی تقریب کے دوران دلہن کا نوجوان بیٹا جورڈن اپنے سوتیلے والد کے لیے خلوصِ دل سے اپنے جذبات کا اظہار کر رہا ہے اور اس کی والدہ اور سوتیلے والد توجہ سے سن رہے ہیں۔

اس ویڈیو میں دلہن کے نوجوان بیٹے جورڈن کو یہ کہتے ہوئے سنا جاسکتا ہے کہ ’میں دلہن کا بیٹا ہوں اور اب باقاعدہ دولہے کا سوتیلا بیٹا بھی ہوں، سوتیلے والد کے ساتھ کھڑے ہوکر میں خود کو بہت خوش قسمت محسوس کرتا ہوں کیونکہ اُنہوں نے اپنی زندگی کی محبت یعنی میری والدہ سے شادی کی جو کہ دراصل میری زندگی کی پہلی محبت ہیں‘۔

اس نے ہنستے ہوئےیہ بھی کہا کہ’انہوں نے میری والدہ کے ساتھ شادی (بائے ون گیٹ ون فری) والے موقع کو دیکھتے ہوئےکی، مذاق کے علاوہ بات کروں تو بھی وینے نے مجھے اور میری والدہ کو بطور ایک بہترین پیکج ہی دیکھا ہے۔

جورڈن نے اپنی اس جذباتی اور مزاحیہ تقریر کے اختتام پر اپنی والدہ اور اپنے سوتیلے والد کا شادی کرکے اسے ایک مکمل فیملی دیکھنے کا موقع دینے پر شکریہ بھی ادا کیا۔

اس ویڈیو کو سوشل میڈیا صارفین کی جانب سے بہت پسند کیا جارہا ہے اور اس نوجوان لڑکے کی تقریر کی بھی خوب تعریفیں کی جارہی ہیں۔