بھارتی شہری نے ماں بیوی اور بچوں کا بہیمانہ قتل کر کے خودکشی کرلی

بھارت کی ریاست اتر پردیش میں ایک شخص نے اپنی ماں، بیوی اور 3 بچوں کو قتل کر کے خودکشی کرلی۔

بھارتی پولیس کے مطابق 42 سالہ انوراگ سنگھ نشے کا عادی، شرابی اور ذہنی طور پر بھی بیمار تھا، وہ اکثر گھر والوں کے ساتھ جھگڑا بھی کرتا تھا کیونکہ گھر والے اسے علاج کے لیے سینٹر بھیجنا چاہتے تھے۔

بھارتی میڈیا کے مطابق آج جھگڑے کے فوراً بعد انوراگ سنگھ نے اپنی 65 سالہ ماں ساوتری کو گولی مار کر ہلاک کردیا اور بیوی 40 سالہ پرینکا کو ہتھوڑے سے مار ڈالا۔

رپورٹس کے مطابق انوراگ سنگھ نے اس کے بعد اپنے تینوں بچوں جن کی عمریں 12، 9 اور 6 سال تھیں انہیں گھر کی چھت سے پھینک دیا اور بعد ازاں خود کو گولی مار کر خودکشی کرلی۔

بھارتی میڈیا کے مطابق اس پورے واقعے پر گاؤں کے رہائشیوں نے افسوس کا اظہار کیا ہے، لاشوں کو پوسٹ مارٹم کے لیے بھیجے جانے کے وقت گاؤں کے رہائشیوں کی بڑی تعداد گھر کے باہر جمع ہوگئی تھی۔

بھارتی پولیس کے مطابق اس واقعے کی تحقیقات کر رہے ہیں جس کے بعد مقدمہ درج کرنے کا فیصلہ کیا جائے گا۔