بعض لوگ وفاق اور حکومت بلوچستان کامعاہدہ خراب کرنا چا ہتے ہیں، زمیندار ایکشن کمیٹی

کوئٹہ (آن لائن) زمیندار ایکشن کمیٹی کے چیئرمین ملک نصیر احمد شاہوانی کی زیر صدارت ایکشن کمیٹی کا اجلاس ہوا، اجلاس میں مختلف اضلاع سے تعلق رکھنے والے ایگزیکٹو کمیٹی کے ارکان نے شرکت کی۔ اجلاس میں ایگزیکٹو ممبر حاجی عبد الجبار کاکڑ نے اسلام آباد میں سینیٹ کی قائمہ کمیٹی برائے کم ترقی یافتہ علاقہ جات کے اجلاس کی کارروائی سے متعلق ایگزیکٹو ارکان کو آگاہ کیا۔حاجی عبدالرحمنٰ بازئی نے وزیر اعلیٰ کے ساتھ اجلاس کی کارروائی کی آگاہی دی۔ اجلاس میں بتایا گیا کہ چیف سیکرٹری کی ڈپٹی کمشنرز کو ہدایت کے بعد ڈپٹی کمشنرز کی زمینداروں و کیسکو حکام کے ساتھ ملاقاتیں کی گئیں۔ ملک نصیر احمد شاہوانی نے کہا کہ سولرائزیشن منصوبے سے متعلق مختلف حربے استعمال ہوئے لیکن ناکامی کا سامنا ہوا ،وفاق اور حکومت بلوچستان کے درمیان معاہدہ ہوا اور صورتحال واضح ہے۔ بعض لوگ منصوبے کو خراب کرنے کی کوشش کررہے ہیں تاہم زمیندار ایکشن کمیٹی اس سازش کو ناکام بنائے گی۔ کوئی بھی ڈپٹی کمشنر وزیر اعلیٰ بلوچستان یا چیف سیکرٹری کے احکامات کو نظر انداز نہیں کر سکتا یہ صوبائی سطح پر طے کردہ ہے۔ بلوچستان کی بجلی کی بحالی میں حاجی مہمند ترین اور حاجی عبد الجبار کاکڑ کا اہم کردار ہے جس پر انہیں خراج تحسین پیش کرتے ہیں۔ تمام زمینداران اس بات پر متفق ہیں کہ پہلے مرحلے میں سولرائزیشن کا عمل مکمل کیا جائے اس کے دوسرے دن غیر قانونی ٹیوب ویلز کے خلاف بے شک کارروائی شروع کی جائے۔ چیف سیکرٹری بلوچستان سے ملاقات ہوگی اور درپیش مسائل سے آگاہ کیا جائے گا۔