سرمایہ کاروں کی کم دلچسپی، PIA کی نجکاری کی بولی ایک ماہ کیلئے موخر

اسلام آباد(اسرارخان) حکومت نے پاکستان انٹرنیشنل ایئرلائنز (پی آئی اے) کی نجکاری کی مالیاتی بولی میں ایک ماہ کی تاخیر کر دی ہے، اور بولی کی تاریخ کو یکم اکتوبر سے بڑھا کر 31 اکتوبر 2024 کر دیا گیا ہے۔ 

ذرائع کے مطابق تاخیر کی وجہ بولی دہندگان کی کم دلچسپی اور اہم مسائل جیسے غیر حل شدہ عدالتی مقدمات، طیاروں کی عمر اور شہری ہوابازی کے مسائل ہیں۔

اس ہفتے کے آغاز میں نجکاری کمیشن کے سیکریٹری عثمان باجوہ نے قومی اسمبلی کی نجکاری سے متعلق قائمہ کمیٹی کو بتایا کہ چھ پہلے سے منتخب بولی دہندگان کو حتمی بولی کے دستاویزات فراہم کر دیے گئے ہیں، اور ابتدائی طور پر مالیاتی بولی کی تاریخ یکم اکتوبر مقرر کی گئی تھی۔

ایک وفاقی وزیر کی جانب سے پی آئی اے کی ملکیت میں ترکی ایئرلائن کی دلچسپی کا دعویٰ کیا گیا تھا، لیکن ترکی ایئرلائن نے بلومبرگ کے ذریعے جاری کردہ ایک بیان میں اس کی فوری تردید کر دی۔

نجکاری ڈویژن کے سیکریٹری جواد پال سے تاخیر پر تبصرہ حاصل کرنے کی کوشش ناکام رہی۔جون میں، چھ کنسورٹیا کو پی آئی اے کے 60 فیصد حصص کے لیے بولی کے لیے منتخب کیا گیا تھا۔ 

بولی دہندگان میں فلائی جناح لمیٹڈ، ایئر بلیو لمیٹڈ، عارف حبیب کارپوریشن لمیٹڈ، Y.B. ہولڈنگز پرائیویٹ لمیٹڈ کی قیادت میں ایک کنسورٹیم، پاک ایتھانول کی قیادت میں ایک کنسورٹیم اور بلیو ورلڈ سٹی کی قیادت میں ایک کنسورٹیم شامل ہیں۔