فرمان الہی
نماز کے اوقات
صدرِ مملکت آصف علی زرداری کا کہنا ہے کہ عالمی دن پر کینسر کے خلاف کوششیں جاری رکھنے کے عزم کا اعادہ کرتے ہیں۔
کینسر سے بچاؤ کے عالمی دن پر جاری کیے گئے پیغام میں آصف علی زرداری نے کہا کہ کینسر کا عالمی دن کینسر سے درپیش چیلنجز سے نمٹنے کی یاد دہانی کراتا ہے۔
صدرِ مملکت نے کہا کہ پاکستان میں کینسر کی بیماری کی سنگینی کا اِدراک کرنا ضروری ہے۔
انہوں نے کہا کہ کینسر اموات کی سب سے بڑی وجوہات میں سے ایک ہے جو صرف صحت کا مسئلہ نہیں بلکہ ایک سماجی چیلنج بھی ہے۔
آصف علی زرداری نے کہا کہ شعبۂ صحت پر کینسر کا بوجھ کم کرنے کے لیے تجدیدِ عہد اور تیز تر کاوشوں کی ضرورت ہے۔
ان کا کہنا ہے کہ پاکستان کینسر کے مسئلے سے نمٹنے کے لیے کوششیں کر رہا ہے، پاکستان نےصحت کا بنیادی ڈھانچہ مضبوط بنانے اور کینسر کے علاج کے لیے اقدامات کیے ہیں۔
صدرِ مملکت نے کہا کہ کینسرکی علامات، تشخیص اور علاج پر آگاہی پیدا کرنے کے لیے میڈیا کا تعاون ناگزیر ہے، ہر فرد کو بروقت تشخیص، مؤثر علاج، ہمدردانہ نگہداشت تک رسائی حاصل ہونی چاہیے۔
انہوں نے یہ بھی کہا کہ آئیں عہد کریں کہ کینسر کی روک تھام اور کنٹرول کو قومی ترجیح بنائیں گے، یقین ہے کہ سب مل کر کینسر سے متاثرہ افراد کے لیے امید اور شفاء کا باعث بن سکتے ہیں۔
