فرمان الہی
نماز کے اوقات
وفاقی وزیرِ داخلہ محسن نقوی نے کہا ہے کہ نادرا سینٹر میں بغیر انتظار کام ہونا خوش آئند ہے، خوشی ہوئی کہ شہریوں کو انتظار کی زحمت نہیں ہو رہی، شہریوں کے لیے آسانیاں پیدا کرنے کے لیے اقدامات کرتے رہیں گے۔
وفاقی وزیرِ داخلہ محسن نقوی نے نادرا میگا سینٹر بلیو ایریا کا دورہ کیا جہاں انہوں نے جدید خودکار مشین اور شناختی کارڈ نمبر فیڈ کر کے فنگر پرنٹس کے ذریعے خود کار نظام کا مشاہدہ کیا۔
وزیرِ داخلہ نے نادرا میگا سینٹر میں شہریوں کے لیے سہولتوں کا جائزہ لیا، شناختی کارڈ اور دیگر دستاویزات بنوانے کے لیے آئے شہریوں سے ملاقات بھی کی۔
محسن نقوی نے شہریوں سے شناختی کارڈ اور دیگر دستاویزات بنوانے سے متعلق دریافت کیا۔
شہریوں نے نادرا میگا سینٹر میں فراہم کردہ سہولتوں پر اطمینان اور تشکر کا اظہار کرتے ہوئے وزیرِ داخلہ کو بتایا کہ اب انتظار نہیں کرنا پڑتا۔
شہریوں کا کہنا تھا کہ عملہ بھی بہت تعاون کرتا ہے، آپ کے آنے سے حالات بہتر ہوئے ہیں۔
وزیرِ داخلہ محسن نقوی نے نادرا میگا سینٹر کے شفٹ انچارج، عملے، چیئرمین نادرا محمد منیر اور ان کی ٹیم کو شاباش دی اور کارکردگی کو سراہا۔
