فرمان الہی
نماز کے اوقات
نیشنل ڈیزاسٹر مینجمنٹ اتھارٹی (این ڈی ایم اے) نے آج سے ملک کے بیشتر علاقوں میں مون سون کے نئے اسپیل سے متاثر ہونے کا خدشہ ظاہر کرتے ہوئے الرٹ جاری کر دیا ہے۔
این ڈی ایم اے کے مطابق سندھ کے ساحلی اضلاع کراچی، ٹھٹھہ، سجاول، بدین، تھرپارکر میں 30 اگست تا 2 ستمبر کے دوران شدید بارشیں متوقع ہیں۔
این ڈے ایم اے کا کہنا ہے کہ بارشوں کے آنے والے نئے اسپیل کے نتیجے میں ممکنہ شدید بارشوں کے باعث ملک کے معاشی حب کراچی میں شہری سیلاب کا خدشہ ہے۔
اندرونِ سندھ کے اضلاع بشمول حیدرآباد، دادو، سکھر، گھوٹکی، لاڑکانہ، جیکب آباد، کشمور میں 30 اگست تا 1 ستمبر موسلا دھار بارشوں کا امکان ہے۔
پنجاب
این ڈی ایم اے کے مطابق 29 اگست تا 2 ستمبر اسلام آباد میں گرج چمک کے ساتھ مزید بارش متوقع ہے، پنجاب کے شمالی و شمال مشرقی اضلاع میں 30 اور 31 اگست کے دوران شدید بارشوں کے سبب سیلابی صورتحال متوقع ہے۔
پنجاب کے شمالی اضلاع میں راولپنڈی، اٹک، جہلم، چکوال، لاہور، گوجرانوالہ، سیالکوٹ، گجرات، نارووال، حافظ آباد، منڈی بہاؤالدین شامل ہیں۔
وسطی و جنوبی پنجاب میں 29 تا 31 اگست کے دوران بارشیں متوقع ہیں جن کے پیشِ نظر نشیبی علاقے زیرآب آنے کا خدشہ ہے۔
ملتان، ڈی جی خان، راجن پور، لیہ، بھکر، ساہیوال، بہاولپور، بہاولنگر اور رحیم یار خان میں ممکنہ بارشوں کے باعث سیلابی صورتحال کا خدشہ ہے۔
صوبۂ خیبر پختونخوا
اسی طرح خیبر پختونخوا میں بھی 29 تا 31 اگست کے دوران شدید بارشوں کی پیش گوئی کی گئی ہے۔
این ڈی ایم اے کی جانب سے جاری کیے گئے الرٹ کے مطابق مالاکنڈ و ہزارہ ڈویژن میں لینڈسلائیڈنگ کا خدشہ ہے، کے پی اضلاع میں چترال، دیر، سوات، بونیر، مانسہرہ، ایبٹ آباد، پشاور، نوشہرہ، مردان، ڈی آئی خان، ٹانک، کوہاٹ اور بنوں شامل ہے۔
آزاد کشمیر
آزاد کشمیر میں مظفرآباد، باغ، حویلی، کوٹلی، میرپور، بھمبرمیں 29 اگست تا 2 ستمبر کے دوران شدید بارشوں کے ساتھ ساتھ لینڈ سلائیڈنگ کا خدشہ ہے۔
گلگت بلتستان
گلگت بلتستان میں 29 تا 31 اگست تک بارشیں متوقع ہیں جن کے نتیجے میں لینڈ سلائیڈنگ اور گلیشیائی جھیلوں کے پھٹنے (GLOF) کا خدشہ ہے۔
گلگت بلتستان کے اضلاع میں گلگت، سکردو، ہنزہ، دیامر، استور، غذر اورگانچھے شامل ہیں۔
بلوچستان
این ڈی ایم کے مطابق بلوچستان کے ساحلی و مشرقی اضلاع بشمول گوادر، کیچ، پنجگور، خضدار، لسبیلہ، قلات میں 29 اگست تا 1 ستمبر تک بارشیں متوع ہیں جن کے پیشِ نظر نشیبی علاقوں سیلاب کا خدشہ ہے۔
این ڈی ایم اے کا کہنا ہے کہ ملک بھر میں ممکنہ مزید بارشوں کے نتیجے میں دریائے راوی، ستلج اور چناب کے ملحقہ علاقوں میں سیلابی صورتحال میں مزید شدت متوقع ہے۔
