گزشتہ چھ ماہ سے کسی پشتو فلم کا ریلیز نہ ہونا باعث تشویش ہے، آصف خان

کراچی( اسٹاف رپورٹر ) پشتو فلموں کے معروف اداکار و فلمساز آصف خان نے کہا ہے کہ پشتو فلم گزشتہ دو دہائیوںسے ملکی فلمی صنعت کو زندہ رکھے ہوئے ہیں ، فلمی صنعت کے بد ترین حالات میں بھی پشتو فلموں نے فلم انڈسڑی کو استحکام دیا۔ اور ہر طرح کے معاشی اور مالی بحران سے تحفظ فراہم کیا ۔ لیکن ہم سب کے لیے یہ بات آج باعث تشویش ہے کہ گزشتہ چھ ماہ کے دوران کوئی ایک بھی پشتو فلم ریلیز نہیں ہوسکی ۔ فلمی صنعت میں آج جو رونق اور گہما گہی ہے۔ ان میں پشتو فلم میکرز کی کاوشوں اور محنت کا بھی بڑا دخل ہے ۔ لیکن اب ہماری فلمیں سست روی کا شکار ہیں ۔ یہ اس بات کی علامت ہے کہ اب حالات خراب ہیں ۔ یہ بات انہوں نے مقامی فلم تقسیم کار کے دفتر میں خصوصی گفتگو میں کہی ۔