سزا معطلی اور رہائی :ن لیگ کا جشن ،مٹھایاں تقسیم ،بھنگڑے بھی ڈالے

ملک کے مختلف شہروں میں سابق وزیراعظم نوازشریف ،مریم نواز اور کیپٹن (ر) صفدر کی سزا معطلی کے فیصلےاور رہائی کی خوشی میں رہنمائوں اور کارکنوں نے جشن منایا ،مٹھایاں تقسیم کی اور بھنگڑے ڈالے ۔

نوازشریف ،مریم نواز اور کیپٹن صفدر کی رہائی کا فیصلہ سن کر مریم اورنگزیب کی آنکھوں میں خوشی کے آنسو آگئے ،وہ ڈوپٹے کے پلو سے آنسو پونچھتی رہیں۔

فیصلے پرخوشی کا اظہار کرتے ہوئے خواجہ آصف کی زبان پھسل گئی ،انصاف کا بول بالا کہنے کے بجائے بولا بولا کہہ گئے ۔

فیصلہ سننے کیلئے اسلام آباد ہائیکورٹ کے باہر بڑی تعداد میں ن لیگ کے کارکن جمع تھے،سزا معطلی کا فیصلہ سنتے ہی جشن منایا اور خوب نعرے بازی کی ۔

راولپنڈی ،لاہور ،ملتان ،گوجرانوالہ ،حیدرآباد،سکھر ، گلگت،حیدرآباد،سیالکوٹ ،گجرات،رحیم یار خان،لودھراں ،چنیوٹ ،وہاڑی ،جہلم سمیت ملک کے مختلف شہروں میں ن لیگی کارکنوں نے بھنگڑے ڈالے اور جشن منایا ۔

ملتان میں ن لیگی کارکنوں نے قائدین کی سزا معطلی اور رہائی کے فیصلے پر شکرانےکے نوافل ادا کئے ، چوک کچہری پر جشن منایا، ایک دوسرے کو مٹھائی کھلائی اوربھنگڑے ڈالے ۔

فیصل آباد میں بھی کارکنوں میں مٹھائی تقسیم کی اور رقص کیا،سیالکوٹ میں لیگی کارکنوں نے خواجہ آصف کے گھر کے باہر جشن منایا۔

گجرات اورگوجرانوالہ میں ن لیگ یوتھ ونگ کی جانب سےبکروں کا صدقہ دیاگیا، ن لیگ کے خرم دستگیر اوررانا کامران کی رہائشگاہ پر جشن منایا گیاجبکہ بہاولپور میں نواز شریف اور مریم نواز کےحق میں نعرے بازی کی گئی۔

رحیم یارخان، لودھراں، چنیوٹ،وہاڑی، جہلم ، پاکپتن شکر گڑھ، بہاول نگر، ٹوبہ ٹیک سنگھ اور کمالیہ سمیت پنجاب کے مختلف شہروں میں لیگی کارکنوں نے جشن منایا۔

حیدرآباد میں لیگی کارکنوں نے پریس کلب کے باہر جشن منایا اور مٹھائی تقسیم کی اور سکھر میں شکرانے کے نوافل ادا کئے گئے۔

گلگت میں بھی کارکنوں میں خوشی کی لہر دوڑگئی، آزاد کشمیر کے شہر تتہ پانی اور نکیال میں بھی کارکنوں نے نواز شریف، مریم نوازاور کیپٹن صفدر کی سزا معطلی پرجشن منایا۔

کوئٹہ میں پاکستان مسلم لیگ ن بلوچستان کےکارکنوں کی جانب سے میاں محمدنوازشریف ،بیٹی مریم نوازاور داماد کیپٹن ریٹائرڈ صفدر کےحق میں اسلام آباد ہائیکورٹ کےفیصلےکی خوشی منائی گئی۔