فرمان الہی
نماز کے اوقات
پاکستان کے معروف اداکار و گلوکار فرحان سعید ملک کے لیے ناقابل فراموش خدمات سرانجام دینے والی عظیم شخصیات کو خراج تحسین پیش کررہے ہیں۔
سماجی رابطوں کی ویب سائٹس پر اداکار نے اداکار قوی خان، صوفی گلوکارہ عابدہ پروین اور معروف کامیڈین عمر شریف کو ان کی خدمات کا اعتراف کرتے ہوئے خراج تحسین پیش کیا ہے۔
فرحان سعید نے اپنے اس اقدام سے قبل اپنے مداحوں کو آگاہ کیا تھا کہ وہ پاکستان کے لِونگ لیجنڈز کی کاوشوں کو سراہنے کیلئے ایک عاجزانہ سی کوشش کررہے ہیں۔
انہوں نے مداحوں سے کہا تھا کہ وہ لوگ جنہوں نے بے غرض ہمارے ملک کی خدمت کی ہے، ان سب کی بے مثال لگن کو خراج تحسین پیش کرنے کیلئے میرا ساتھ دیں اور ان لیجنڈز کا شکریہ ادا کریں۔
انسٹا پوسٹ میں فرحان سعید نے قوی خان کو خراج تحسین پیش کرتے ہوئے ایک یادگار تصویر شئیر کی اور لکھا کہ انہیں حال ہی میں ٹیلی ویژن اور فلم اسکرین دونوں پر ان کے ساتھ کام کرنے کا موقع ملا۔
انہوں نے قوی خان کے الفاظ قول کی صورت میں لکھے کہ ’ نیت میں سچائی اور محبت میں خلوص ہی محبت کا صدقہ ہے۔‘
فرحان کے مطابق ’کوئی بھی جو قوی خان کے ساتھ کام کرچکا ہے، جانتا ہے کہ ان کا سلوک دوسرے کو احترام کرنے پر مجبور کردیتا ہے۔ انہوں نے لکھا کہ قوی خان اپنی ذات میں ایک ادارہ ہیں۔‘
لیجنڈری شخصیات کو خراج تحسین پیش کرنے کے حوالے سے شروع کی گئی سیریز میں فرحان سعید نے عابدہ پروین کو بھی خراج تحسین پیش کیا۔
عابدہ پروین کو خراج تحسین پیش کرتے ہوئے فرحان سعید نے لکھا کہ عالمی شہرت یافتہ عابدہ پروین کسی تعارف کی محتاج نہیں۔
انہوں نے لکھا کہ عابدہ پروین کو دنیا بھر میں صوفی موسیقی کی ملکہ کے طور پر جانا جاتا ہے، ان کی ترتیب دی ہوئی روح پرور دھنیں سننے والوں کو ایک سحر میں مبتلا کر دیتی ہیں۔
فرحان سعید نے بتایا کہ وہ اپنی زندگی میں بہت کم موقعوں پر عابدہ پروین سے ملے ہیں لیکن جب بھی ان کی ملاقات ہوئی انہوں نے عابدہ پروین کی آنکھوں میں دوسروں کیلئے عاجزی اور احترام دیکھا ہے۔
معروف کامیڈین عمر شریف کی خدمات کے اعتراف میں فرحان سعید نے لکھا کہ وہ ہمیشہ سے ہی عمر شریف کے پرستار رہے ہیں۔
فرحان سعید نے لکھا کہ وہ متعدد بار بھارت کا دورہ کرچکے ہیں اور اگر غیر ملک میں کوئی پاکستان کی کامیڈی اور ثقافت کا سفیر ہے تو وہ کوئی اور نہیں بلکہ عمر شریف ہیں۔
گلوکار نے لکھا کہ سرحد پار موجود عمر شریف کے مداحوں نے اُن سے محبت، احترام اور تعریف کے پیغامات پہنچانے کو کہا۔
اپنے پیغام کے آخر میں فرحان سعید نے لکھا کہ پاکستان کیلئے ان کی خدمات بے مثال ہیں، یہ تعریفی جملے ان کی خدمات پر سراہنے کیلئے بہت کم ہیں۔
