فرمان الہی
نماز کے اوقات
وہ گھر جس میں آپ نے اپنی زندگی کا ایک بڑا حصہ گزارا ہو، اسے فروخت کرنا ایک انتہائی جذباتی فیصلہ ہوتاہے۔ کئی وجوہات کے باعث، آپ جب اس ریئل اسٹیٹ کو فروخت کرنے جارہے ہوں، جسے آپ اپنا ’’گھر‘‘ کہتے ہیں، اس کے ساتھ آپ ایک زبردست جذباتی لگاؤ رکھتے ہیں۔
گھر کے ساتھ جذباتی لگاؤ ایک زبردست احساس ہے لیکن یہ بات بھی اتنی ہی اہم ہے کہ جب آپ اپنے گھر کو فروخت کرنے کے لیے قیمت کا تعین کرنے لگیں تو اس عمل میں جذبات کو حائل نہ ہونے دیں۔ ایک بار جب آپ گھرفروخت کرنے کا فیصلہ کرلیتے ہیں، اس کے بعد اسے آپ کس طرح جلد از جلد فروخت کرسکتے ہیں، ذیل میں یہی جاننے کی کوشش کی گئی ہے۔
درست قیمت کا تعین
ایک انتہائی مسابقتی مارکیٹ میں، جہاں فروخت کے لیے دستیاب گھر بھی محدود تعداد میں دستیاب ہوں، ان کی درست قیمت کا تعین گھر جلد فروخت کرنے میں معاون ثابت ہو سکتا ہے۔ اس کے نتیجے میں خریداروں کی دلچسپی بڑھ سکتی ہےاور آپ کو کئی پارٹیوں کی جانب سے خریداری کی پیش کش آسکتی ہے۔ اگر آپ کا گھر ایک سے زیادہ دلچسپی رکھنے والے خریداروں کو پسند آجائے تو یہ بھی ممکن ہوتا ہے کہ آپ اپنے گھر کو مجوزہ قیمت سے زیادہ پر فروخت کرنے میں بھی کامیاب ہو جائیں۔
ایسے میں سوال یہ پیدا ہوتا ہے کہ آپ اپنے گھر کی درست قیمت کا تعین کس طرح کرسکتے ہیں؟ وارم اَپ کے طور پر، آپ کو سب سے پہلے ٹھنڈے دماغ کے ساتھ مارکیٹ کے موجودہ زمینی حقائق کا جائزہ لینا ہوگا۔
اس کے لیے آپ کو کچھ تحقیق کرنا ہوگی اور اعدادوشمار کے گورکھ دھندے کو سمجھنا پڑے گا۔ اپنے گھر کی درست قیمت کا تعین کرنے کے لیے آپ کو اپنے آس پاس ایسی ہی خصوصیات رکھنے والے دیگر گھروں کو دیکھنا پڑے گاکہ ان کی کیا قیمتیں چل رہی ہیں۔ اگر آپ کے گھر کا رنگ و روغن خراب ہورہا ہے تو اسے گلی کے کونے پر تعمیر شدہ نئی عمارت کے گھر سے تشبیہہ دینے کا کوئی فائدہ نہیں ہوگا۔
مہنگا فروخت کرنا
بدقسمتی سے ہمارے یہاں ریئل اسٹیٹ کی خرید و فروخت اور قیمتوں کے اعدادوشمار عوام کو دستیاب نہیں ہوتے لیکن ہم دیگر ملکوں کے رجحانات ضرور جان سکتے ہیں۔ مثال کے طور پر، ریڈ فِن ہاؤسنگ رپورٹ کے مطابق، گزشتہ ایک سال کے دوران امریکا میں فروخت ہونے والے 36فی صد گھر ان کی مارکیٹ قیمت سے زائد پر فروخت ہوئے اور اس کی وجہ یہ تھی کہ مارکیٹ میں فروخت کے لیے دستیاب گھروں کی تعداد میں پچاس فی صد کمی دیکھی گئی۔
ایسے ماحول میں، گھر کو زائد قیمت پر بیچنے کی سوچ رکھنا دل کو کافی لبھاتی ہے لیکن اگر ایسی صورتِ حال میں آپ کاگھر فوری طور پر فروخت نہ ہوسکا تو یہ چیز آپ کے خلاف جاسکتی ہے۔ عمومی طور پر یہ دیکھا گیا ہے کہ اگر آپ نے اپنے گھر کی قیمت مارکیٹ رجحان سے زائد مقرر کی ہوئی ہے اور وہ ایک مہینے تک اس قیمت پر نہیں بکتا تو پھر اس کا مطلب یہ ہے کہ آپ کا گھر مقرر کردہ قیمت پر فروخت نہیں ہوگا۔ ایسے میں بہتر یہی ہے کہ آپ اپنے گھر کو بیچنے کے لیے اس کی قیمت کم کرنے میں مزید دیر نہ لگائیں، ورنہ آپ پھنس کر رہ جائیں گے۔
مارکیٹ قیمت سے کم پر نہ بیچیں
آپ کو یہ بات بھی ذہن میں رکھنی چاہیے کہ اپنے گھر کو فروخت کرنے کے لیے اس کی قیمت اس قدر بھی کم نہ کردیں کہ بعد میں آپ کو ہی پچھتانا پڑے۔ ہر شخص کی زندگی کے حالات مختلف ہوتے ہیں۔ اگر آپ نے پہلے ہی دوسرا گھر خریدنے کا سودا کرلیا ہے اور اس کی مقررہ وقت پر ادائیگی کرنی ہے یا دونوں گھر بینک مارگیج پر ہیں تو آپ ایک مشکل صورتِ حال سے دوچار ہیں، ایسے میں آپ کی کوشش یہی ہونی چاہیے کہ گھر کو جلد از جلد فروخت کرنے کا سودا کرلیں۔ایسے میں ضروری ہے کہ آپ نظم اور صبر کا دامن نہ چھوڑیں اور حکمتِ عملی کے تحت کام کریں۔
ماہر کی خدمات لیں
گھر کی فروخت کے لیے اپنے علاقہ کے ماہر اور قابلِ بھروسہ ریئل اسٹیٹ ایجنٹ کی خدمات حاصل کرنے سے آپ کا کام آسان ہوسکتا ہے۔ وہ ناصرف آپ کے گھر کی درست قیمت کا تعین کرنے میں آپ کی مدد کرے گا بلکہ ممکنہ خریداروں کا بھی بندوبست کرسکتا ہے۔ اس کام کے لیے آپ کو ایسے ریئل اسٹیٹ ایجنٹ کا انتخاب کرنا چاہیے جو آپ کو درست مشورے دے اور درست سمت کا تعین کرنے میں آپ کی مدد کرے۔
اپنے لیے ایجنٹ کا انتخاب کرنے سے پہلے آپ کئی ایجنٹوں سے مل کر ان کے خیالات جان سکتے اور ریئل اسٹیٹ مارکیٹ کے بارے میں ان کی معلومات کا اندازہ لگا سکتے ہیں۔ قریبی دوستوں اور رشتہ داروں کو بھی کہا جاسکتا ہے کہ وہ آپ کا رابطہ کسی قابلِ بھروسہ ایجنٹ کے ساتھ قائم کروائیں۔
اگر آپ ایک اچھا لائحہ عمل ترتیب دے کر اور پھر اس پر عمل کرتے ہوئے اپنے گھر کو فروخت کے لیے مارکیٹ میں لاتے ہیں تو اس بات کے امکانات بڑھ جائیں گے کہ آپ اپنے گھر کو بروقت اور درست قیمت پر فروخت کرنے میں کامیاب ہوجائیں۔
