مری میں سانحے کی رات انتظامیہ حرکت میں آئی، تمام ایس او پیز طے تھے لیکن عمل نہیں کیا گیا، سانحہ مری کے مزید حقائق سامنے آگئے۔
رپورٹ میں انکشاف ہوا ہے کہ پلاننگ تھی لیکن مکمل عملدرآمد کا فقدان تھا، مری میں سانحے کی رات انتظامیہ حرکت میں آئی۔
تحقیقاتی رپورٹ کے مطابق پی ڈی ایم نے محکمہ موسمیات کی وارننگ میسج واٹس ایپ پر ڈالی، ڈی سی کمشنر کو رپورٹ دیتے رہے کہ صورتحال کو سنبھال لیں گے۔
رپورٹ میں کہا گیا ہے کہ مری میں محکمہ سیاحت کی استعداد کار بڑھائی جائے۔
وزیراعلیٰ پنجاب عثمان بزدار نے کہا کہ سانحہ مری کی انکوائری رپورٹ میں غلفت اور کوتاہی کی نشاندہی کی گئی ہے، متعلقہ حکام اپنے فرائض کا ادراک کرنے سے قاصر رہے، اسسٹنٹ کمشنر مری کو بھی عہدے سے ہٹادیا گیا۔
لاہور میں پریس کانفرنس کرتے ہوئے وزیراعلیٰ پنجاب نے کہا کہ ڈپٹی کمشنر کو عہدے سے ہٹاکر انضباطی کارروائی کی سفارش کی گئی، سی پی او راولپنڈی اور اے ایس پی مری کو عہدے سے ہٹا کر انضباطی کارروائی کا حکم دیا گیا ہے۔
وزیراعلیٰ پنجاب نے کہا کہ سی ٹی او راولپنڈی، ڈی ایس پی ٹریفک کو عہدے سے ہٹاکر انضباطی کارروائی کا حکم دیا گیا ہے۔
عثمان بزدار نے کہا کہ کمشنر راولپنڈی کو عہدے سے ہٹا کر معطل کرنے کی سفارش کی گئی ہے، تمام افسران کو معطل کرکے ان کے خلاف انضباطی کارروائی کا حکم دیا گیا ہے۔
وزیر اعلیٰ پنجاب نے کہا کہ قوم سے سانحہ مری کی شفاف انکوائری کا وعدہ پورا کیا ہے، ڈویژنل فاریسٹ آفیسر مری، ڈسٹرکٹ ایمرجنسی آفیسر مری کو معطل کیا گیا ہے، انچارج مری ریسکیو1122، ڈائریکٹر پی ڈی ایم اے پنجاب کو بھی معطل کردیا گیا ہے۔