وفاقی وزیر منصوبہ بندی احسن اقبال کا کہنا ہے کہ پی ٹی آئی دور میں کرپشن انڈیکس ایسے تیزی سے بڑھا جیسے خلا میں راکٹ جاتا ہے۔
اسلام آباد میں گورننس انوویشن لیب کے افتتاح پر خطاب کرتے ہوئے انہوں نے کہا کہ یہ سہولت 2018 میں تیار کی تھی لیکن حکومت کی تبدیلی سے منصوبہ رہ گیا۔
احسن اقبال کا کہنا تھا کہ جس حکومت نے سب سے زیادہ شفافیت قائم کی اسے چور ڈاکو کہا گیا۔
انہوں نے کہا کہ ڈیلی میل نے وزیراعظم کی کردار کشی کی، اب انہوں نے معافی مانگی ہے، ڈیلی میل کو سہولت پچھلی حکومت نے فراہم کی تھی۔
وفاقی وزیر کا کہنا تھا کہ ہم اپنی مینجمنٹ کو درست کرلیں تو دوسرے ملکوں کو پیچھے چھوڑ سکتے ہیں، شفافیت کو نافذ کرنے میں زیادہ مستقل مزاجی سے کام کا اعادہ کرنا چاہیے۔
انہوں نے کہا کہ آج ہم شدید مالی بحران کا شکار ہیں، بین الاقوامی سرمایہ کار بھی پاکستان سے دور ہوگئے ہیں۔
ان کا کہنا تھا کہ نیب نے سرکاری افسروں کو وعدہ معاف گواہ بننے پر زور دیا، اس فضا میں کوئی ملک ترقی نہیں کرسکتا۔
انہوں نے مزید کہا کہ پبلک سیکٹر میں شفافیت لانا ضروری ہے، اپنی وزارت کی ویب سائٹ پر ہاٹ لائن قائم کر رہے ہیں۔