وزیرِ خارجہ کے منصب پر فائز پاکستان پیپلز پارٹی کے موجودہ چیئرمین بلاول بھٹو زرداری کا کہنا ہے کہ بے نظیر بھٹو شہید کا تدبر اور فلسفۂ مفاہمت دنیا کی مشترکہ میراث ہے، وہپاکستان میں جمہوری جدوجہد کی معمار تھیں۔
بلاول بھٹو زرداری نے گڑھی خدا بخش میں اپنی والدہ شہید محترمہ بے نظیر بھٹو کی 15 ویں یومِ شہادت کی تقریب سے خطاب کرتے ہوئے انہیں خراجِ عقیدت پیش کیا ہے۔
ان کا کہنا ہے کہآج جمہوری قوتوں کا ایک پیج پر ہونا شہید بے نظیر بھٹو کے نظریے کی کامیابی ہے، تمام جمہوری قوتیں وطن کو درپیش مشکلات سے نمٹنے کے لیے پُرعزم ہیں۔
بلاول بھٹو نے کہا کہ ہم ہر روز شہید بے نظیر بھٹو کو یاد کرتے ہیں، ان کے فکر و وژن سے رہنمائی حاصل کرتے ہیں، اُنہوں نے ہمیشہ نفرت نہ کرنا اور دوسروں کو معاف کرنا سکھایا۔
انہوں نے کہا ہے کہ شہید بی بی پسماندہ طبقات اور اقلیتوں کے حقوق کی محافظ اور خواتین کی ترقی کی علم بردار تھیں۔
بلاول بھٹو زرداری نے کہا ہے کہ وہ شہری آزادیوں کی وکیل، وفاقی اکائیوں میں ہم آہنگی اور اتحاد کی داعی تھیں، وہ وفاق کی مضبوط علامت تھیں۔
اُنہوں نے مزید کہا کہ پیپلز پارٹی شہید بی بی کی سوچ و فلسفے پر کاربند رہتے ہوئے جدوجہد آگے بڑھائے گی اور ملک سے غربت، بھوک اور بے روزگاری کے خاتمے کے لیے جدوجہد کرے گی۔
وزیرِ خارجہ کا یہ بھی کہنا ہے کہ ہم ملک میں رواداری، مساوات اور بھائی چارے پر قائم معاشرہ تشکیل دینے کے لیے پُرعزم ہیں۔