یو ایس ایڈ کا سیلاب زدہ علاقوں کیلئے مزید ایک کروڑ 60 لاکھ ڈالر امداد کا اعلان

June 06, 2023

یو ایس ایڈ نے سندھ کے سیلاب زدہ علاقوں کیلئے مزید ایک کروڑ 60 لاکھ ڈالر کی امداد کا اعلان کر دیا۔

ڈپٹی ایڈمنسٹریٹر یو ایس ایڈ اور امریکی سفیر ڈونلڈ بلوم نے خیرپور کے سیلاب زدہ علاقوں کا دورہ کیا۔

اس موقع پر ڈپٹی ایڈمنسٹریٹر یو ایس ایڈ نے اضافی ایک کروڑ 64 لاکھ ڈالر امداد کا اعلان کرتے ہوئے کہا کہ سیلاب کے بعد خوراک کا بحران سنگین ہوگیا ہے،صحت کی فراہم کردہ سہولتیں ناکافی ہیں۔

ان کا کہنا تھا کہ سیلاب متاثرین کی امداد و بحالی کیلئے پہلے 20 کروڑ ڈالر کی امداد دی، اب ایک کروڑ 60 لاکھ ڈالر کی امداد مزید جاری کر رہے ہیں۔

امریکی سفیر ڈونلڈ بلوم نے کہا کہ خوراک کا سنگین بحران دیکھا، 16 لاکھ سے زائد بچے خوراک کی قلت کا شکار ہیں۔

صوبائی وزیر صحت عذرا پیچوہو نے کہا کہ کھانے و پینے کی اشیا کے 5 ہزار کارٹن تقسیم کیے ہیں۔