سندھ کے ضلع نوشہروفیروز کے بعد پنجاب کےمظفرگڑھ میں بھی منہ سے جوتا اٹھوانے کا انسانیت سوز واقعہ دہرایا گیا، گلی سے گزرنے پر منع کرنے والے نوجوان کو بااثر ملزمان نے تشدد کا نشانہ بنایا،منہ سے چپل پکڑوائی، پیروں کو ہاتھ لگوائے۔
تشدد کا نشانہ بننے والے نوجوان کاتعلق مظفرگڑھ کے علاقہ سنانواں سے ہے، نوجوان کا قصور صرف اتنا تھا کہ اس نے اوباش نوجوانوں کو گلی سے گزرنے سے منع کیا تھا، جس پر بااثر ملزمان احسن کو بہانے سے ڈیرے پر لے گئے، ملزمان نے نوجوان کو مرغابنایا، چپلیں ماریں، منہ سے چپل پکڑوائی اور پیروں کو ہاتھ لگوا کر زبردستی معافی منگوائی گئی۔
تشدد کی ویڈیو منظر عام پر آنے کے بعد پولیس نے ایک ملزم حمزہ کو گرفتار کرلیا جبکہ اس کے دیگر ساتھی غلام محمد، بلال بھٹی، میثم بھٹی اور علی بھٹی فرار ہیں۔
گزشتہ ما ہ نوشہروفیروز میں بھی دو مزدور بھائیوں کی گدھا گاڑی وڈیرے کی گاڑی سے ٹکراگئی تھی، جس پر وڈیرے نے دونوں بھائیوں کو تشدد کا نشانہ بنایا تھا اور منہ سے جوتا اٹھوا کر معافی منگوائی تھی۔