گرم موسم میں عام طور پر پسینہ زیادہ آنے کی وجہ سے جسم میں پانی اور نمکیات کی کمی کے باعث صحت کے مسائل پیدا ہوجاتے ہیں۔
گرم موسم میں بہت ہی معمولی رقم اگر کچھ خاص کھانے پینے کی چیزوں پر خرچ کرلی جائے تو یہ ڈاکٹروں اور دواؤں کے خرچے سے آپ کو بچا سکتی ہے۔
موسم گرم ہو تو کھیرے بے حد فائدہ مند ہوتے ہیں جو جسم میں فوری طور پر ٹھنڈک پیدا کرتے ہیں اور جسم کے درجہ حرارت میں کمی لاتے ہیں۔ اسے سلاد یا پھر اس کے جوس میں لیموں اور ادرک ملا کر بھی پیا جا سکتا ہے۔
گرمیوں کا خاص پھل تربوز بھی بے شمار فوائد سے بھرا ہوا ہے۔ یہ جسم میں پانی کی کمی نہیں ہونے دیتا اور اس میں میگنیشیئم، پوٹاشیئم، فائبر اور وٹامن بی ہوتا ہے۔
پھلوں کا بادشاہ آم، گرمیوں کے موسم میں بے شمار فوائد والے پھلوں کی فہرست میں شامل ہے جو جسم کو ٹھنڈا رکھنے اور ہاضمے میں بھی مدد کرتا ہے۔
دہی کا استعمال کر کے بھی گرم موسم میں پانی کی کمی اور دیگر مسائل سے بچا جا سکتا ہے، اس کے علاوہ اس میں موجود کیلشیئم کی بھرپور مقدار ہڈیوں کے لیے بھی بہت مفید ہوتی ہے۔
دہی کو لسی یا پھر آم، اسٹرابیری اور دیگر پھلوں کے ساتھ کھا کر یا جوس بنا کر بھی اس کے فوائد دگنے کیے جا سکتے ہیں۔
ناریل کا پانی بھی جسم میں پانی کی کمی نہیں ہونے دیتا اور یہ ہاضمے کے لیے بھی مفید ہوتا ہے۔
پودینہ، پیاز اور لیموں کا استعمال بھی گرم موسم میں بہت مفید ہوتا ہے۔ لیموں اور پودینے کا جوس یا انہیں سلاد میں شامل کر کے بھی کھایا جاسکتا ہے۔