میانوالی میں موسیٰ خیل روڈ پر واپڈا کا ہائی وولٹیج تار ٹوٹ کر روڈ پر گرنے اور کرنٹ لگنے سے 7 سالہ بچہ جاں بحق ہو گیا، ورثاء نے لاش روڈ پر رکھ کر احتجاج کیا ہے۔
موسیٰ خیل روڈ پر واپڈا کا ہائی وولٹیج تار گزشتہ رات تیز آندھی کی وجہ سڑک پر ٹوٹ کر گر گیا تھا اور صبح کے وقت روڈ کے کنارے آباد علاقے راجمیر والہ کا 7 سالہ بچہ اس تار سے کرنٹ لگنے سے جاں بحق ہو گیا۔
بچے کے ورثاء نے لاش روڈ پر رکھ کر احتجاج کیا اور واپڈا حکام کے خلاف کارروائی کرنے کا مطالبہ کیا ہے۔
شہریوں کا کہنا ہے کہ واپڈا کے ہائی وولٹیج تاروں کا ٹوٹ کر گرنا معمول بن چکا ہے اور بار بار نشان دہی کے باوجود واپڈا حکام ٹس سے مس نہیں ہوتے۔
انہوں نے مطالبہ کیا ہے کہ واپڈا فیسکو حکام اس نا اہلی کا نوٹس لیں اور ذمے داروں کے خلاف کارروائی کریں تاکہ مستقبل میں ایسے واقعات سے بچا جا سکے۔
دوسری جانب ڈی پی او میانوالی مطیع اللّٰہ نوانی نے نوٹس لیتے ہوئے واپڈا حکام کے خلاف مقدمہ درج کرنے کا حکم دیتے ہوئے احتجاج کی وجہ سے بلاک روڈ کو ٹریفک کے لیے کھلوا دیا۔