اپوزیشن لیڈر خورشید شاہ سے ملاقات میں برطانوی ہائی کمشنر تھامس ڈریو نے بتایا کہ حکومت پاکستان کی طرف سے الطاف حسین کے خلاف کارروائی سے متعلق خط موصول ہوگیا، ٹھوس ثبوت ملنے کے بعد ہی کارروائی کی جا سکے گی۔
پارلیمنٹ ہاؤس میں میڈیا سے غیررسمی گفتگو کرتے ہوئے خورشید شاہ نے بتایا کہ برطانوی ہائی کمشنر سے ملاقات میں انہوں نے بانی ایم کیوایم کے خلاف کارروائی کا مطالبہ کیا اور بتایا ہے کہ قائد ایم کیو ایم ہمارے لیے مسئلہ بن گئے ہیں۔
انہوں نے بتایا کہ برطانوی ہائی کمشنر نے کہا کہ حکومت پاکستان کا خط مل گیا ہے، ابھی ہمارے پاس ٹھوس ثبوت نہیں ہیں، ثبوت ملنے پر کارروائی کریں گے۔
دوسری جانب وزیر داخلہ چوہدری نثار سے بھی برطانوی ہائی کمشنر تھامس ڈریو نے ملاقات کی ہے جس کے دوران پاک برطانیہ تعلقات اور مختلف امور میں جاری دوطرفہ تعاون پر بات چیت کی گئی۔