کراچی پولیس چیف مشتاق مہر کا کہنا ہے کہ کراچی میں اسٹریٹ کرائم کے 35 ہاٹ اسپاٹ ہیں، اسٹریٹ کرائم والے مقامات پر نفری لگا رہے ہیں، نفری کم ہے، اس لیے بیس ہزاربھرتیاں کی ہیں ۔
کراچی میں ضلع سٹی کے دفتر میں سٹیزن پولیس لائژن کمیٹی کے دفتر کی افتتاحی تقریب کے موقع پر وہ میڈیا سے گفتگو کر رہے تھے، تقریب میں تاجر برادری، اسپورٹس مین اورعلاقہ معززین بھی شریک تھے۔
اے آئی جی مشتاق مہر نے امید ظاہر کی کہ دفترکےقیام سے لیاری اور اولڈسٹی ایریامیں کمیونٹی پولیسنگ کو فروغ ملے گا۔
انہوں نے مزید کہا کہ کمپنیوں کو موٹرسائیکلوں میں بھی ٹریکر لگوانے کا مشورہ دیا ہے، موبائل فون چھیننے کی وارداتیں روکنے کے لیے آئی ایم ای آئی نمبر بلاک کرنے والا سافٹ ویئر بنایا جارہا ہے۔
اےآئی جی مشتاق مہر کا مزید کہنا تھا کہ لیاری کی نئی نسل اپنی توانائی مثبت جگہ صرف کرے،یہاں ہونےوالےجرائم میں کم عمرنوجوانوں کو ملوث دیکھا گیا ہے،تاجر برادری کے ساتھ مل کر لیاری میں کھیل اور ثقافتی سرگرمیاں کی جانی چاہئیں ۔