وفاقی ویر اطلاعات و نشریات فواد چوہدری نے کہا ہے کہ پہلے کے فیصلوں کی طرح آج کے فیصلے کا احترام واجب سمجھتے ہیں،معاملہ آگے بڑھے گااور قانون اپنا راستہ لے گا۔
ایون فیلڈ ریفرنس میں نوازشریف ،مریم نواز اور کیپٹن (ر) صفدر کی سزا معطلی کی خبر پر تبصرہ کرتے ہوئے فواد چوہدری نے کہا کہ شریف خاندان کے کردار سے متعلق قوم کی نظرمیں کوئی ابہام نہیں،قوم چاہتی ہے لوٹی ہوئی دولت واپس لائی جائے۔
انہوں نے مزید کہا کہ عدالتوں کا مکمل احترام کرتے ہیں،پاکستان میں عدالتیں آزاد ہیں، شریف خاندان اب بھی ثابت نہیں کرسکا کہ ان کی ملکیت میں اربوں روپے کہاں سے آئے۔
وفاقی وزیر نے یہ بھی کہا کہ قومی احتساب بیورو آزاد اور خودمختار ادارہ ہے،نیب اپنی سرگرمیاں خود کرتا ہے، حکومت کا اس میں کوئی کردار نہیں،حکومت اور عوام کرپشن میں ملوث افراد کیخلاف کارروائی چاہتے ہیں۔
ان کا کہناتھاکہ اسلام آباد ہائی کورٹ کا فیصلہ پروسیجرل بنیاد پر سامنے آیا ہے ،معاملہ آگے بڑھے گا اور قانون اپنا راستہ خود بنائے گا۔