امریکی محکمہ خارجہ کی ترجمان ہیدر نوریٹ نے کہا کہ پاک بھارت وزرائے خارجہ ملاقات کی خبر پاکستانیوں اور بھارتیوں کے لیے بہت شاندار ہے، ملاقات سے دونوں ملکوں کو مل کر بیٹھنے اور بات کرنے کا موقع ملے گا۔
ترجمان نے مزید کہا کہ امریکا پاکستانی اور بھارتی وزرائے اعظم کے درمیان مثبت پیغامات سے بھی آگاہ ہیں، امید ہے کہ اچھے اور مضبوط تعلقات کے لیے ماحول بنے گا۔
واضح رہے کہ وزیراعظم عمران خان نے گزشتہ روزبھارتی وزیراعظم نریندر مودی کے خط کا جواب دیا ہے جس میں انہوں نے پاک بھارت مذاکرات کی بحالی پر زور دیا ہے جبکہ وزیراعظم نے تجویز دی تھی کہ اقوام متحدہ کی جنرل اسمبلی کے اجلاس کے دوران دونوں ممالک کے وزرائے خارجہ کی ملاقات طے کی جائے۔
بھارت نے اقوام متحدہ کی جنرل اسمبلی اجلاس میں پاک بھار ت وزرائے خارجہ کی ملاقات کے لیے وزیراعظم عمران خان کی تجویز قبول کرلی ہے۔ذرائع کا کہنا ہے کہ پاک بھارت وزرائے خارجہ ملاقات 27 ستمبر کو نیویارک میں ہو گی۔