بھارتی فلم انڈسٹری کے سب سے بڑے سپر اسٹارشاہ رخ خان اپنی بلاک بسٹر فلموں کی وجہ سے نا صرف بھارت بلکہ پوری دنیا میں کافی مقبول ہیں اور اسی لیے ان کے مداحوں کی تعداد بھی کروڑوں میں ہے جو اُن سے متعلق ہر چھوٹی بڑی بات جاننے کا اشتیاق رکھتے ہیں۔
بالی ووڈ کنگ شاہ رخ خان کو لے کرآج کل ایک نئی بحث جاری ہے کہ اُن کے پاس سب سے مہنگی ترین چیز کیا ہے؟
بھارتی اخبار ٹائمز نائو کی ایک رپورٹ کے مطابق شاہ رخ خان مسلسل 3 دہائیوں سے بالی ووڈ پر راج کررہے ہیں۔ اُن کی اب تک کی کل مالیت 5 ہزار 100 کروڑ بھارتی روپے ہےجبکہ اُ ن کی سالانہ آمدنی 256 کروڑ ہےاور اس لحاظ سے شاہ رخ خان دنیا کے امیر ترین اداکار ہیں۔
شاہ رخ خان جن دنوں اپنی فلم زیرو کی تشہیری مہم کے سلسلے میں مصروف تھے تب میڈیا کی جانب سے ان سے سوال کیا گیا کہ آپ کے پاس سب سے مہنگی ترین چیز کیا ہے؟ جس کے جواب میں انہوں نے فوراً کہا کہ ان کا گھر’منت‘ ہے۔
میڈیا رپورٹس کے مطابق شاہ رخ خان کا گھر منت ممبئی کے علاقے بندرا میں واقع ہے جہاں سے سمندر کا نظارا بھی کیا جاسکتا ہے جبکہ ان کے گھر کی قیمت تقریباً 200 کروڑ ہے۔