پنجاب کے وزیر قانون راجہ بشارت نے کہاہے کہ ان کا اور وزیر اعلیٰ کا لائسنس معطل کرنے والے اپنا شوق پورا کر لیں، پنجاب اسمبلی میں اپوزیشن نے قانون سازی کے موقع پر بائیکاٹ کے نئے ریکارڈ قائم کیے ہیں۔
پنجاب اسمبلی کیفے ٹیریا میں وزیر قانون راجہ بشارت نے میڈیا بریفنگ میںکہا کہ حکومت نے اب تک ریکارڈ قانون سازی کی ہے جبکہ اپوزیشن ایوان کے اندر کچھ اور میڈیا کے سامنے کچھ اور بات کرتی ہے۔
راجہ بشارت کا کہنا تھا کہ لاہور میں صفائی کے معاملات پر خصوصی توجہ دیں گے، لائسنس معطلی کے معاملے پر ان کا کہنا تھا کہ انہوں نے تو کبھی پریکٹس نہیں کی، پی آئی سی معاملے پر حکومتی کمیٹی نے رپورٹ دیدی ہے جس پر ایکشن ہوگا۔
وزیر قانون پنجاب نے کہا کہ پی آئی سی واقعے پر انصاف عدالت نے دینا ہے حکومت کا کام مقدمات درج کرکے گرفتاریاں کرنا تھا ۔
ان کا کہنا تھا کہ مشرف کے خلاف فیصلے سے ملکی و غیر ملکی سطح پر جگ ہنسائی ہوئی ہے۔