پشاور(نیوزڈیسک)خیبرپختونخوا کے وزیر جنگلات، ماحولیات اور جنگلی حیات سید محمد اشتیاق ارمڑ نے متلقہ افسران اور ٹھیکیداروں کوہدایت کی ہے کہ حلقہ پی کے 69میں صحت ، تعلیم ، بجلی ، سڑکوں اور پلوں سمیت عوامی فلاح و بہبود کی ترقیاتی سکیموں کی بروقت تکمیل کو ممکن بنائیں تاکہ علاقے کے لوگوں کو جلد ہی بنیادی سہولیات فراہم ہو سکیں ۔یہ ہدیات انہو ں نے پشاور میں پی کے 69میں جاری اور نئے ترقیاتی منصوبوں کے حوالے منعقدہ ایک اجلاس کی صدارت کرتے ہوئے دیں ۔ اس موقع پر ایکسین واپڈا کے علاوہ صحت ، تعلیم ، مواصلات اور آبپاشی کے محکموں کے افسران بھی موجود تھے ۔ اجلاس میں چمکنی ، ترناب ، میاں گجر ، میرہ کچوڑی ، ارمڑ اور دیگر علاقوں میں ترقیاتی سکیموں کے حوالے کام کا جائزہ لیا گیا ۔ صوبائی وزیر نے اجلاس سے خطاب کرتے ہوئے کہا کہ صوبائی حکومت نے عوام کی سابقہ محرومیوں کے ازالے کا پختہ عزم کر رکھا ہے لہذا متعلقہ افسران عوامی فلاح و بہبود کے لئے تمام دستیاب وسائل بروئے کار لاکر عرصہ دراز سے نظر انداز اضلاع کو بھی ترقیافتہ علاقوں کے برابرلائیں۔