سندھ ہائی کورٹ نے کراچی میں مسلم لیگ نون کے رہنما اور سابق وزیرِ اعظم میاں نواز شریف کے داماد کیپٹن (ر) صفدر کے خلاف مقدمہ درج کرانے والے وقاص خان کی ضمانت منظور کر لی۔
مفرور ملزم وقاص خان نے عدالتِ عالیہ میں اپنی ضمانت قبل از گرفتاری کی درخواست دائر کی تھی۔
عدالت نے پولیس پر حملے میں ملوث ہونے کے مقدمے میں مفرور ملزم وقاص کی ضمانت منظور کی ہے۔
سندھ ہائی کورٹ نے 30 ہزار روپے کے عوض ملزم وقاص کی حفاظتی ضمانت منظور کرتے ہوئے ملزم کو 10 دن کے اندر متعلقہ عدالت سے رجوع کرنے کی ہدایت کر دی۔
مفرور ملزم وقاص کیپٹن (ر) صفدر کے خلاف مقدمے میں مدعی بھی ہے۔
درج مقدمے کے مطابق ملزم وقاص نے 25 اگست 2019ء کو گلشنِ معمار میں پولیس پر حملہ کیا تھا۔
مقدمے میں ملزم کے خلاف پولیس موبائل کو نقصان پہنچانے اور پولیس پر پتھراؤ کرنے کے الزامات عائد ہیں۔
ملزم وقاص کے ساتھ اس مقدمے میں دیگر 58 افراد بھی شامل ہیں، ملزم کے خلاف ایف آئی آر سائٹ سپر ہائی وے تھانے میں درج ہے۔