وزیر خارجہ شاہ محمود قریشی نے ہنگری کے ہم منصب سے ملاقات میں بتایا کہ حکومت نے بیرونی سرمایہ کاروں کی سہولت کیلئے ’ای ویزا‘ کا آغاز کیا ہے۔
شاہ محمود قریشی نے وزارتِ خارجہ میں ہنگری کے وزیر خارجہ و تجارت پیٹرسجارتو سے ملاقات کی اور انہیں آمد پر خوش آمدید کہا، دونوں رہنماؤں کے درمیان ہوئی ملاقات میں دو طرفہ تعلقات، تجارتی و اقتصادی تعاون سمیت باہمی دلچسپی کے امور پر تبادلۂ خیال کیا گیا۔
وزیر خارجہ نے کہاکہ پاکستان اور ہنگری کے مابین دو طرفہ تجارت کے وسیع امکانات موجود ہیں،پاکستان ابھرتی ہوئی مارکیٹ ہے جہاں سرمایہ کاری کے وسیع مواقع ہیں۔
شاہ محمود قریشی نے بتایا کہ حکومت سرمایہ کاروں کو ٹیکس چھوٹ سمیت پرکشش مراعات دے رہی ہے۔
انہوں نے ہنگری کے وزیر خارجہ و تجارت پیٹرسجارتو کو آگاہ کیا کہ پاک چین اقتصادی راہداری کے تحت سرمایہ کاری کے وسیع مواقع موجود ہیں۔
ملاقات میں ہنگری کے وزیر خارجہ نے افغان امن عمل میں پاکستان کی مصالحانہ کوششوں کو سراہا۔