آسکر ایوارڈز کا بائیکاٹ کرنے والے ایرانی ہدایت کار اصغر فرہادی نے صدر ڈونلڈ ٹرمپ کی جانب سے سات اسلامی ملکوں پر عائد سفری پابندی کے فیصلے کو غیرانسانی قرار دیا ہے۔
آسکر ایوارڈز میں غیر ملکی فلموں کی کیٹگری میں نامزد اصغر فرہادی کی فلم سیلزمین نے 2017 کا آسکر ایوارڈز حاصل کر لیا، فرہادی نے اس تقریب کا بائیکاٹ کیا تھا اور ان کا انعام ان کی جگہ دو ایرانی نژاد امریکیوں نے وصول کیا۔
اس موقع پر فرہادی کی تقریر اسٹیج پر پڑھ کر سنائی گئی جس میں فرہادی کا کہنا تھا کہ میری غیرموجودگی کی وجہ اپنے ملک اور دیگر چھ ملکوں کے شہریوں کا احترام ہے، جن کی ایک غیرانسانی قانون کے تحت بےعزتی کی گئی ہے جو امریکا نےعائد کیا، دنیا کو امریکا اور اس کے دشمن جیسی کیٹگری میں تقسیم کرنے سے خوف پیدا ہو گا۔