پاکستان میں چینی سفیر پر حملے کا خدشہ

وفاقی دارالحکومت میں چینی سفارتخانے کے حکام نے خدشہ ظاہر کیا ہے کہ پاکستان میں ان کے سفیر پر حملہ ہوسکتا ہے جن کی ان کے پاس اطلاعات موجود ہیں اس خدشے کے پیش نظر چینی سفارتخانے نے پاکستان کی وزارت داخلہ سے درخواست کی ہے کہ اس صورتحال کا فوری نوٹس لیتے ہوئے مطلوبہ حفاظتی اقدامات کئے جائیں۔

موصولہ اطلاعات کے مطابق پاک چین اقتصادی راہداری کے فوکل پرسن پنگ ین فائی نے وزارت داخلہ کے حکام کو اپنے ان خدشات کا اظہار تحریری طور پر کیا ہے اور حوالے سے تحریری طور پر فراہم کردہ معلومات میں یہ بھی کہا گیا ہے کہ چینی سفیر پر حملے کیلئے ایک دہشت گرد پاکستان داخل ہوچکا ہے ۔

مبینہ طور پر اس دہشت گرد کے پاسپورٹ اور دیگر شناختی تفصیلات فراہم کرتے ہوئے یہ بھی درخواست کی گئی ہے کہ مطلوبہ دہشت گرد کو گرفتار کرکے چین کے حوالے کیا جائے تاکہ وہ اپنے مذموم مقاصد میں کامیاب نہ ہوسکے۔