وزیراعلیٰ خیبر پختونخوا محمود خان کا بغیر سیکیورٹی شہر کے مختلف علاقوں کا دورہ

وزیراعلیٰ خیبر پختونخوا محمود خان کی جانب سے بغیر سیکیورٹی پروٹوکول کے شہر  پشاور کے مختلف علاقوں کا دورہ کیا گیا ہے۔

وزیراعلیٰ محمود خان نے اس دوران تحصیلدار سٹی آفس، سروس ڈیلیوری سینٹر، رجسٹرار آفس کا معائنہ کیا اور سروس ڈیلیوری سینٹر میں صفائی کی ناقص صورتحال پر بھی عدم اطمینان کا اظہار کیا۔

دورے کے دوران وزیراعلیٰ کے پی کی جانب سے تحصیلدار اور رجسٹرار آفس سے متعلق ڈپٹی کمشنر سے رپورٹ طلب کر لی گئی۔

محمود خان کی جانب سے  انتقالات کے اجراء میں تاخیر کی شکایت پر دو پٹواریوں کو معطل کرتے ہوئے ہدایت جاری کی گئی، محمود خان کا کہنا تھا کہ رجسٹرار کے خلاف انکوائری کر کے رپورٹ پیش کی جائے۔

وزیراعلی  محمود خان کی جانب سے خان رازق شہید پولیس اسٹیشن، قصہ خوانی، چوک یادگار کا بھی دورہ کیا گیا۔

وزیراعلی نے خان رازق تھانے کی خستہ حالی، صفائی کی ناقص صورتحال اور بے ہنگم ٹریفک پر سی سی پی او سے رپورٹ طلب کرلی۔