فرمان الہی
نماز کے اوقات
لیفٹیننٹ جنرل ریٹائرڈ نعمان محمود مکہ دفاعی معاہدے کے تحت پہلے سیکریٹری جنرل مقرر کردیے گئے۔
وزارت خارجہ کا کہنا ہے کہ سیکریٹری جنرل ریاض میں قائم کیے جانے والے اتحاد کے جنرل سیکریٹریت کی قیادت کریں گے۔
یاد رہے کہ ترک وزیرِ خارجہ ہاقان فیدان نے گز شتہ ماہ تصدیق کی تھی کہ ترکیہ، پاکستان اور سعودی عرب کے درمیان مکہ دفاعی معاہدے کا سیکریٹری جنرل پاکستان سے ہوگا۔
ترکیہ کے صدر رجب طیب اردوان، سعودی عرب کے ولی عہد محمد بن سلمان اور پاکستان کے وزیراعظم محمد شہباز شریف نے 7 اگست کو مکہ مکرمہ میں مکہ مشترکہ دفاعی معاہدے پر دستخط کیے تھے۔
ترکیہ، پاکستان اور سعودی عرب نے خطے اور عالمی سطح پر بڑھتی ہوئی عدم استحکام کی صورتحال کے پیش نظر مشترکہ ذمہ داری اور علاقائی ملکیت کے تصور کے تحت یہ معاہدہ کیا۔
معاہدے کا بنیادی مقصد علاقائی اور عالمی سطح پر سلامتی، امن، استحکام اور خوش حالی کو فروغ دینا اور تینوں ممالک کی مشترکہ دفاعی بازدار صلاحیت کو مضبوط بنانا ہے۔
معاہدے کی سب سے اہم شقوں میں سے ایک کے مطابق فریقین میں سے کسی ایک ملک پر ہونے والا حملہ تمام فریقین پر حملہ تصور کیا جائے گا۔
معاہدے میں خطے میں تعاون کی ایک نئی ثقافت کو فروغ دینے پر بھی زور دیا گیا ہے۔ اس کے تحت بین الاقوامی قوانین کا احترام کرنے اور پرامن تعاون کے مشترکہ وژن پر یقین رکھنے والے دیگر ممالک اور متعلقہ فریقوں کے لیے بھی اتحاد میں شمولیت کی گنجائش رکھی گئی ہے۔
استنبول میں اسٹریٹجک سیاسی و دفاعی کمیٹی کا پہلا اجلاس اس معاہدے کو عملی شکل دینے کی جانب ایک اہم پیش رفت ہے، کیونکہ اس کے ذریعے تینوں ممالک نے مشترکہ دفاعی تعاون کو محض ایک سیاسی اعلان کے بجائے مستقل ادارہ جاتی اور عملی ڈھانچے میں تبدیل کرنے کا عمل شروع کردیا ہے۔
