سدھو موسے والا کا آخری گانا یوٹیوب سے کیوں ہٹایا گیا؟ وجہ سامنے آگئی

بھارت میں یوٹیوب پلیٹ فارم سے پنجابی گلوکار سدھو موسے والا کا آخری گانا ’SYL‘ ہٹانے کی وجہ سامنے آگئی۔

بھارتی میڈیا رپورٹس کے مطابق آنجہانی گلوکار سدھو موسے والا کی موت کے بعد ریلیز ہونے والا اُن کا آخری گانا ’SYL‘ بھارت میں یوٹیوب پلیٹ فارم سے ہٹا دیا گیا جبکہ پاکستان سمیت دیگر ممالک میں یہ گانا یوٹیوب پر موجود ہے۔

سدھو موسے والا کا آخری گانا یوٹیوب سے ہٹا دیا گیا

بھارتی میڈیا کی جانب سے دعویٰ کیا گیا ہے کہ بھارت میں یوٹیوب نے پنجابی گلوکار سدھو موسے والا کے آخری گانے SYL کو اپنے پلیٹ فارم سے ہٹا دیا ہے جوکہ 23 جون کو ریلیز کیا گیا تھا۔

رپورٹ میں بتایا گیا کہ بھارتی حکومت کی جانب سے سدھو موسے والا کے اس گانے کو متنازع قرار دیا جارہا ہے کیونکہ اس گانے میں بھارتی پنجاب میں پانی کے مسائل سمیت خالصتان تحریک کے رہنماؤں کا ذکر کیا گیا ہے۔

اس کے علاوہ سدھو موسے والا کے اس آخری گانے میں سکھوں کا جھنڈا بھی دکھایا گیا ہے۔

سدھو موسے والا کے اس گانے کو اب تک 27 ملین سے زائد افراد یوٹیوب پر سُن چکے ہیں۔

موت کے 23 دن بعد سدھو موسے والا کا آخری گانا ریلیز

بھارت کے معروف پنجابی گلوکار شبھ دیپ سنگھ سدھو عرف سدھو موسے والا کی موت کے تقریباََ ایک ماہ کے بعد اُن کا آخری گانا ریلیز کردیا گیا، جو ریلیز ہوتے ہی چھا گیا۔

واضح رہے کہ اس گانے کو خود سدھو موسے والا نے گایا، لکھا اور کمپوز کیا اور جیسے ہی یہ گانا ریلیز ہوا تو مداح جذباتی ہوگئے تھے۔

پنجابی گلوکار کو 29 مئی کو ضلع مانسا میں گولی مار کر ہلاک کر دیا گیا تھا۔