عمران خان باجوہ کی وجہ سے بے اختیار تھے تو جرات کر کے فارغ کردیتے، نیئر بخاری

پاکستان پیپلز پارٹی (پی پی پی) کے سیکریٹری جنرل نیئر بخاری کا کہنا ہے کہ عمران خان کی کل کی تقریر میں جنرل (ر) قمر جاوید باجوہ پر براہ راست الزامات تھے، اگر عمران خان ان کی وجہ سے بے اختیار وزیراعظم تھے تو جرات کرکے ان کو فارغ کر دیتے۔

اپنے بیان میں نیئر بخاری نے کہا کہ جنرل ریٹائرڈ قمر جاوید باجوہ کو توسیع دینے کا فیصلہ غلط نہیں تھا، جنرل ریٹائرڈ قمر جاوید باجوہ کی ایکسٹینشن کے وقت ملکی حالات میں تناؤ تھا، توسیع کی حمایت اس وقت کے ملکی حالات کے پیش نظر کی۔

نیئر بخاری نے کہا کہ بیساکھیوں کے عادی عمران خان اسمبلیوں کی تحلیل سے متعلق اب بھی گارنٹیز کے منتظر ہیں۔

انہوں نے کہا کہ ریکوڈک بل پر اتحادیوں کے تحفظات دور کر دیے ہیں۔

پی پی رہنما نے کہا کہ مصطفیٰ نواز کھوکھر کو سندھ سے سینیٹر بنا کر پارٹی نے ان پر بہت بڑی نوازش کی تھی، اسلام آباد سے مصطفیٰ نواز کھوکھر چار الیکشن لڑ چکا لیکن کبھی نہیں جیتا۔

 نیئر بخاری نے کہا کہ مردم شماری سے متعلق صرف پیپلزپارٹی نہیں ایم کیو ایم کو بھی تحفظات ہیں۔