خیبر پختون خوا سے کونسے بڑے نام الیکشن لڑ رہے ہیں؟

خیبر پختون خوا میں ہونے والے انتخابی معرکوں میں مسلم لیگ ن کے قائد میاں نواز شریف، جے یو آئی اے کے سربراہ مولانا فضل الرحمٰن، امیرِ جماعتِ اسلامی سراج الحق، پی ٹی آئی کے رہنما بیرسٹر گوہر، عمر ایوب جبکہ آفتاب احمد خان شیرپاؤ سمیت 6 سابق وزرائے اعلی میدان میں ہیں۔

خیبر پختون خوا سیاسی طور پر انتہائی زرخیز صوبہ ہے، جہاں سے اگلے ماہ ہونے والے انتخابی دنگل میں مختلف سیاسی اور مذہبی جماعتوں کے سربراہاں سمیت 30 مضبوط امیدوار قسمت آزمائی کر رہے ہیں۔ 

مسلم لیگ ن کے قائد و سابق وزیرِ اعظم میاں نواز شریف مانسہرہ کے حلقہ این اے 15 سے امیدوار ہیں جہاں ان کا مقابلہ تحریکِ انصاف کے شہزادہ گستاسپ خان اور جے یو آئی ف کے مفتی کفایت اللّٰہ سے ہے۔

ڈی آئی خان کے حلقہ این اے 44 سے جے یو آئی ف کے سربراہ مولانا فضل الرحمٰن، پیپلز پارٹی کے رہنما فیصل کریم کنڈی اور پی ٹی آئی کے علی امین گنڈا پور مدِ مقابل ہوں گے، گزشتہ انتخابات میں یہاں سے علی امین گنڈا پور کامیاب ہوئے تھے۔

امیرِ جماعتِ اسلامی سراج الحق این اے 6 لوئر دیر سے میدان میں ہیں جبکہ این اے 22 مردان سے اے این پی کے مرکزی سینئر نائب صدر و سابق وزیرِ اعلیٰ امیر حیدر ہوتی اور پی ٹی آئی کے عاطف خان کے درمیان کانٹے دار مقابلہ متوقع ہے۔

پی ٹی آئی رہنما بیرسٹر گوہر خان بونیر اور عمر ایوب خان ہری پور سے قومی اسمبلی کی نشستوں پر قسمت آزمائی کر رہے ہیں۔

اسی طرح سابق اسپیکر قومی اسمبلی اسد قیصر این اے 19 صوابی سے الیکشن لڑ رہے ہیں، سابق وزرائے اعلیٰ خیبر پختون خوا اور پی ٹی آئی پی کے چیئرمین پرویز خٹک اور وائس چیئرمین محمود خان نوشہرہ اور سوات سے قومی اور صوبائی اسمبلی کی نشستوں پر الیکشن لڑ رہے ہیں۔

سابق وزیرِ اعلیٰ سردار مہتاب احمد خان ابیٹ آباد سے آزاد حیثیت میں قسمت آزمائی کر رہے ہیں، جے یو آئی کے رہنما اور سابق وزیرِ اعلیٰ اکرم درانی بنوں سے صوبائی اسمبلی کی 2 نشستوں پر میدان میں ہیں۔ 

اے این پی کے مرکزی سیکریٹری جنرل میاں افتخار حسین نوشہرہ سے صوبائی اسمبلی کی نشست کے لیے امیدوار ہیں، اسی طرح این اے 32 پشاور سے اے این پی کے غلام احمد بلور، این اے 25 چارسدہ سے اے این پی کے صوبائی صدر ایمل ولی خان میدان میں ہیں۔

این اے 24 چارسدہ سے قومی وطن پارٹی کے سربراہ اور سابق وزیرِ اعلیٰ آفتاب احمد خان شیر پاؤ، لکی مروت سے پی ٹی آئی کے مرکزی رہنما شیر افضل مروت، اپر دیر سے پیپلز پارٹی کے رہنما نجم الدین خان اور این اے 43 ٹانک سے سابق وفاقی وزیر انور سیف اللّٰہ خان انتخابات میں حصہ لے رہے ہیں۔