نومنتخب اسپیکر بلوچستان اسمبلی عبدالخالق اچکزئی اور  ڈپٹی اسپیکر غزالہ نے اپنے عہدے کا حلف اٹھا لیا۔

پریزائیڈنگ افسر زمرک خان اچکزئی نے اسپیکر سے حلف لیا۔

پاکستان مسلم لیگ ن کے عبدالخالق اچکزئی بلامقابلہ اسپیکر بلوچستان اسمبلی منتخب ہو گئے ہیں۔

سیکریٹری بلوچستان اسمبلی طاہر شاہ کاکڑ نے عبدالخالق اچکزئی کے بلامقابلہ اسپیکر منتخب ہونے کا اعلان کیا تھا۔ 

طاہر شاہ کاکڑ نے کہا تھا کہ پیپلز پارٹی کی غزالہ بھی بلامقابلہ ڈپٹی اسپیکر منتخب ہو گئی ہیں۔

انہوں نے بتایا کہ عبدالخالق اچکزئی اور غزالہ آج 3 بجے عہدوں کا حلف اٹھائیں گے۔

’’تمام جماعتوں کا شکریہ جنہوں نے مجھ پر اعتماد کیا‘‘

نومنتخب اسپیکر بلوچستان اسمبلی عبدالخالق اچکزئی نے میڈیا سے بات چیت کرتے ہوئے کہا کہ تمام جماعتوں کا شکریہ جنہوں نے مجھ پر اعتماد کیا۔

عبدالخالق اچکزئی کا کہنا ہے کہ کوشش ہوگی کہ تمام جماعتوں کو ساتھ لے کر چلوں، کوشش ہوگی کہ ایوان کو منصفانہ طریقے سے چلاؤں۔

واضح رہے اس سے قبل مسلم لیگ ن نے عبدالخالق اچکزئی کو بلوچستان اسمبلی کا اسپیکر نامزد کیا تھا۔

عبدالخالق اچکزئی کی نامزدگی کا فیصلہ نواز شریف اور شہبازشریف نے بلوچستان کی قیادت سے مشاورت کے بعد کیا۔

گزشتہ روز 65 کے ایوان میں سے بلوچستان اسمبلی کے 57 نومنتخب ارکان نے حلف اٹھایا تھا۔