گھر سے کام والے سرکاری ملازمین کا ہفتے میں دو دن دفتر آنے سے انکار

مانچسٹر(نمائندہ جنگ)گھر سے کام کرنے والے سرکاری ملازمین نے ہفتے میں صرف دو دن دفتر آنے کی ہدایت کی تعمیل سے انکار کر دیا ہے۔پبلک اینڈ کمرشل سروسز یونین (پی سی ایس) کے 1000سے زیادہ ارکان کا کہنا ہے کہ انہیں زبردستی واپس نہیں کیا جائے گا۔دفتر برائے قومی شماریات (او این ایس) کے ملازمین جو نیوپورٹ، ساؤتھ ویلز، ٹچفیلڈ، ہیمپشائر، لندن، ڈارلنگٹن، مانچسٹر اور ایڈنبرا میں ہیں پہلے ہی ہڑتالوں کے حق میں ووٹ دے چکے ہیں۔برطانوی ذرائع ابلاغ کے مطابق اب یونین نے کہا ہے کہ 8مئی سے ان کے ممبران ہفتے میں دو دن دفتر میں کام کرنے کی ہدایات کی تعمیل نہیں کریں گے، زیادہ تر سرکاری ملازمین کو اپنا کم از کم60فیصد وقت دفتر میں گزارنا چاہئے، گزشتہ نومبر میں او این ایس نے اعلان کیا تھا کہ 2024کے اوائل سے اس کے کارکنوں کو کام کی جگہ پر کام کے اوقات کا کم از کم 20فیصد گزارنا پڑے گا جو اپریل سے بڑھ کر 40فیصد ہو جائے گا۔پی سی ایس نے کہا کہ بہت سا عملہ پہلے ہی خوشی سے اپنے کام کا40فیصد سے زائد وقت دفتر میں گزارتا ہے لیکن نئی ہدایت کی من مانی نوعیت کے بارے میں بڑے پیمانے پر ناراضگی پائی جاتی ہے ۔ایک ترجمان نے کہا کہ انتظامیہ کے اس وعدے کے بعد کہ کوویڈ وبائی مرض کے بعد عملہ لچکدار طریقے سے کام جاری رکھ سکتا ہے۔ پی سی ایس کے جنرل سیکرٹری فران ہیتھ کوٹ نے کہا کہ ہمارے ممبران انتہائی ہنر مند اور قابل افرادی قوت ہیں وہ اس طرح کے سلوک کے مستحق ہیں جس سے یہ ظاہر ہوتا ہے کہ وہ کئی سالوں سے ہائبرڈ ورکنگ کو کامیابی سے سنبھال سکتے ہیں،نئی پالیسی سنگین رکاوٹ ہے خاص طور پر بچوں کی دیکھ بھال اور دیگر ذمہ داریوں والے عملے کیلئے، وہ لوگ جو اپنے مقرر کردہ دفتر سے کافی فاصلے پر رہتے ہیں۔