جنوبی افریقہ نے بنگلادیش کیخلاف شکست کو جیت میں بدل دیا

ٹی ٹوئنٹی ورلڈکپ 2024 کے 21ویں میچ میں جنوبی افریقہ نے بنگلادیش کے خلاف شکست کو جیت میں بدل دیا۔ 

جنوبی افریقہ کے 114 رنز کے ہدف کے تعاقب میں بنگلادیش کی ٹیم 7 وکٹوں پر 109 رنز ہی بناسکی۔ 

نیو یارک کے نساؤ کاؤنٹی اسٹیڈیم میں کھیلے جانے اس میچ میں جنوبی افریقہ نے ٹاس جیت کر پہلے بیٹنگ کرنے کا فیصلہ کرلیا۔

گزشتہ میچز کی طرح نیو یارک کی وکٹ اس میچ کی پہلی اننگز میں بھی بیٹرز کے لیے ڈراؤنا خواب بنی رہی۔ 

جنوبی افریقہ بیٹرز ابتدا میں تو سنبھل نہ سکے اور بنگلہ دیش کی عمدہ بولنگ کے سامنے بے بس نظر آئے جہاں اسکی 4 وکٹیں 23 رنز پر ہی گر گئیں۔ 

ایسے میں ڈیوڈ ملر اور ہینرک کلاسین نے 79 رنز کی پارٹنرشپ بنا کر ٹیم کے ٹوٹل کو اس مشکل وکٹ پر 100 سے زائد لے جانے میں مدد کی۔ کلاسین 46 اور ملر 29 رنز بنا کر آؤٹ ہوئے۔ 

جنوبی افریقہ نے مقررہ 20 اوورز میں 6 وکٹوں کے نقصان پر 113 رنز بنائے۔ 

بنگلادیش کی جانب سے تنظیم حسن نے 3، تسکین احمد نے 2 جبکہ رشد حسین نے ایک وکٹ لی۔ 

ہدف کے تعاقب میں بنگلادیش کا آغاز تو دم دار نہ تھا، لیکن مڈل آرڈرز میں محموداللّٰہ اور توحید ہریدوئے نے ذمہ دارانہ بیٹنگ کا مظاہرہ کرتے ہوئے میچ کو اپنے حق میں کرلیا۔ 

اننگز کے 17ویں اوور تک بنگلادیشی ٹیم چھائی رہی، اسے اختتامی تین اوورز میں جیت کےلیے 20 رنز چاہیے تھے لیکن جنوبی افریقہ نے شاندار کم بیک کرتے ہوئے میچ کا پانسہ پلٹ دیا۔ 

بنگلادیشی ٹیم اگلے تین اوورز میں صرف 15 جبکہ مقررہ 20 اوورز میں 109 رنز ہی بناسکی۔ 

پروٹیاز کی جانب سے کیشو مہاراج نے تین جبکہ کگیسو رباڈا اور اینرک نورکیا نے دو دو کھلاڑیوں کو آؤٹ کیا۔ 

میچ میں عمدہ بیٹنگ پرفارمنس پر ہینرک کلاسین کو میچ کا بہترین کھلاڑی قرار دیا گیا۔ 

اس فتح کے ساتھ جنوبی افریقہ ورلڈکپ کے سپر 8 مرحلے میں پہنچنے والی پہلی ٹیم بن گئی۔   

بنگلادیش کی ٹیم کپتان نجم الحسن شانتو، تنزید حسن، لٹن داس، توحید ہریدوئے، شکیب الحسن، محموداللّٰہ، جاکر علی، رشد حسین، تنظیم حسن، تکسین احمد اور مستفیض الرحمان پر مشتمل تھی۔ 

جنوبی افریقی ٹیم کی قیادت آیڈن مارکرم کر رہے ہیں جبکہ دیگر کھلاڑیوں میں کوئنٹن ڈی کوک، ریزا ہینڈرکس، ہینرک کلاسین، ڈیوڈ ملر، ٹرسٹین اسٹبز، مارکو یانسین، کیشو مہاراج، کگیسو رباڈا، اینرک نورکیا اور اوٹنیل بارٹمین شامل تھے۔