فرمان الہی
نماز کے اوقات
کراچی کنگز کے کھلاڑی حسن علی نے کہا ہے کہ اچھی پرفارمنس ہوگی تو لوگ پی ایس ایل ضرور دیکھیں گے۔ آئی پی ایل کے ساتھ بھی مقابلہ ہے، اچھی پرفارمنسز ہوگی تو لوگ آئی پی ایل کی بجائے پی ایس ایل دیکھیں گے۔
میڈیا سے گفتگو کرتے ہوئے حسن علی کا کہنا تھا کہ اس بار کراچی کنگز میں بہت سی چیزیں نئی ہیں، امید ہے اچھے رزلٹ دیں گے۔
انہوں نے کہا کہ شان ٹیٹ کے ساتھ پاکستان ٹیم میں بھی کام کیا ہے ان کے ہونے سے ٹیم کو فائدہ ہوگا۔
فاسٹ بولر کا کہنا تھا کہ یہ پی ایس ایل میرے لیے اہم ہے، میں انجری کے بعد کم بیک کر رہا ہوں۔ میری کوشش ہوتی ہے کہ جہاں ٹیم کو ضرورت ہو وہاں پرفارم کروں۔ نیشنل ٹی ٹوئنٹی اچھا رہا تھا، اس مومینٹم کو جاری رکھنے کی کوشش کروں گا۔
انہوں نے کہا کہ جب نیشنل ٹیم اچھا نہیں کرتی تو فرنچائز لیگ پر فرق تو پڑتا ہے، جب قومی ٹیم اچھا کھیلتی ہے تو پی ایس ایل کا گراف بھی اوپر جاتا ہے۔
انکا یہ بھی کہنا تھا کہ ہم سب کو یہاں اچھا پرفارم کرنا ہوگا تاکہ فینز پھر سے پاکستان کرکٹ کی طرف آئیں۔
حسن علی نے کہا کہ قومی ٹیم میں نئے چہرے ہیں ان کو وقت ملنا چاہیے۔ پی ایس ایل میں پرفارمنس دینے والے پلیئرز کو ہمیشہ توجہ ملتی ہے۔
اپنی ٹیم کے بارے میں بات کرتے ہوئے انکا کہنا تھا کہ کراچی کنگز اچھی پرفارمنس دے کر کراچی کے فینز کو پھر سے گراؤنڈ میں لائیں گے۔
