فرمان الہی
نماز کے اوقات
پنجاب بھر میں حالیہ شدید بارشوں اور آندھی کے نتیجے میں 8 افراد جاں بحق جبکہ 27 افراد زخمی ہوئے۔
ریسکیو ذرائع کے مطابق لاہور میں بند روڈ پر بِل بورڈ موٹرسائیکل سوار خاندان پر گرنے سے شوہر جاں بحق جبکہ بیوی اور بیٹا زخمی ہوگئے، داروغے والا میں گھر کی چھت گرنے سے 2 افراد جاں بحق جبکہ کٹار بند روڈ پر دیوار گرنے سے ایک شخص جاں بحق ہوا۔
اسی طرح شیخوپورہ کے گاؤں خان پور میں گھر کی دیوار گرنے سے 10 سالہ بچہ جبکہ کوٹ عبدالمالک میں دیوار گرنے سے ایک شخص جاں بحق ہوگیا۔
نوشہرہ ورکاں میں آسمانی بجلی گرنے سے ایک شخص جاں بحق جبکہ گوجرانوالہ کے گاؤں نندی پور میں کرنٹ لگنے سے ایک شخص جاں بحق ہوا۔
فیروزوالا، قصور، گوجرانوالہ، ننکانہ صاحب اور شیخوپورہ میں بارش اور طوفان کے باعث دیواریں اور چھتیں گرنے سمیت دیگر واقعات میں 27 افراد زخمی ہوئے۔
ریسکیو ٹیم کے ترجمان کے مطابق لاہور اور گرد و نواح میں گرد آلود آندھی، طوفان اور شدید بارش سے نظام زندگی متاثر ہوا ہے۔
ریسکیو کے ذرائع کے مطابق لاہور شہر کے کئی مقامات پر درخت اور بجلی کے پول بھی گر گئے، طوفانی بارش سے لیسکو کے 220 کے وی کے دو گرڈ اسٹیشن بند ہو گئے جس سے لاہور کے متعدد علاقوں کی بجلی معطل ہو گئی۔
لیسکو چیف رمضان بٹ کے مطابق طوفان اور بارش سے 132 کے وی سسٹم بھی متاثر ہوا تھا تاہم لیسکو کے تمام متاثرہ اسٹیشن آہستۃ آہستہ بحال ہونا شروع ہوگئے۔
