• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ریکوڈک منصوبہ مقامی کمیونٹی کی ترقی کی ضمانت ہے، مارک بریسٹو

آج کا اخبار
اہم خبریں
15 جولائی ، 2025
اسلام آباد(مہتاب حیدر) ریکوڈک محض ایک مائننگ منصوبہ نہیں بلکہ یہ ایک نسل در نسل جاری رہنے والا موقع ہے، جو مقامی کمیونٹی کے لیے کئی دہائیوں تک مسلسل معاشی اور سماجی ترقی کی ضمانت دیتا ہے۔ یہ بات بارک مائننگ کارپوریشن کے سی ای او مارک بریسٹو نے پیر کے روز ریکوڈک منصوبے کے قریب ترین گاؤں ہمای کے دورے کے دوران کہی۔مارک بریسٹو نے مقامی کمیونٹی کے افراد سے ملاقات کے دوران ریکوڈک مائننگ کمپنی (RDMC) کی جانب سے بلوچستان کے عوام کو روزگار، تعلیم اور صحت کے شعبوں میں بااختیار بنانے کے عزم کا اعادہ کیا۔انہوں نے کہا، ’’ہم صرف آر ڈی ایم سی کے ذریعے نہیں بلکہ اپنی شراکت دار اور سپلائر کمپنیوں کے وسیع نیٹ ورک کے ذریعے بھی روزگار کے مواقع پیدا کر رہے ہیں جو اس بڑے ترقیاتی منصوبے کی حمایت کے لیے ہمارے ساتھ شامل ہو رہی ہیں۔‘‘مارک بریسٹو نے مزید کہا، ’’یہ یقینی بنانے کے لیے کہ مقامی کمیونٹیز ان مواقع سے فائدہ اٹھا سکیں، ہم نے تعلیمی اور ہنر مندی کے تربیتی پروگراموں کا آغاز کیا ہے۔ اس وقت ہماری افرادی قوت کا 75 فیصد حصہ بلوچستان سے تعلق رکھتا ہے، جن میں اکثریت ضلع چاغی سے ہے، اور ہم اس مقامی نمائندگی کو مزید مضبوط بنانے کے خواہاں ہیں۔‘‘معاشی اور تعلیمی اقدامات کے ساتھ ساتھ، آر ڈی ایم سی نے خطے میں صحت کی سہولیات میں بھی سرمایہ کاری کی ہے۔ ہمای میں ہیلتھ کلینک اور نئے قائم شدہ ماں اور بچے کی صحت مرکز کے ذریعے دیہاتیوں کو معیاری پرائمری ہیلتھ کیئر فراہم کی جا رہی ہے — جو اس علاقے میں پہلی بار ماں اور بچے کی خصوصی سہولت کے طور پر سامنے آئی ہے، جہاں خواتین کو جامع قبل از پیدائش اور بعد از پیدائش نگہداشت دستیاب ہے۔مارک بریسٹو نے کہا کہ ریکوڈک منصوبے کی کامیابی میں مقامی کمیونٹیز کلیدی شراکت دار ہیں۔ انہوں نے کہا، ’’اس عالمی معیار کے معدنی وسائل کی کوئی بامعنی ترقی اس وقت تک ممکن نہیں، جب تک یہاں رہنے والے لوگ اس میں فعال طور پر شامل اور معاون نہ ہوں۔‘‘ہمای گاؤں کے چیف لیاقت ملک اور پَرِ کوہ کمیونٹی ڈویلپمنٹ کمیٹی (CDC) کے چیئرمین تاج محمد نے مارک بریسٹو کی جانب سے کمیونٹی سے مسلسل رابطے اور مصروفیت پر ان کا شکریہ ادا کیا، اور ریکوڈک منصوبے کے ذریعے ہمای گاؤں میں ترقی اور نئے مواقع لانے میں آر ڈی ایم سی کے کردار کو سراہا۔انہوں نے منصوبے کی مسلسل ترقی کے لیے اپنی مکمل حمایت کا یقین دلایا۔مارک بریسٹو کے ہمراہ آر ڈی ایم سی کی اعلیٰ قیادت بھی موجود تھی، جن میں زارر جمالی (کنٹری منیجر)، رائن مچل (جنرل منیجر، ریکوڈک سائٹ)، وو لی (سینئر نائب صدر، ہیڈ آف گورنمنٹ اینڈ کارپوریٹ افیئرز)، ایشلے پرائس (ہیڈ آف سسٹین ایبلٹی)، سائمن باٹمز (ایگزیکٹو، منرل ریسورس مینجمنٹ اینڈ ایویلوایشن)، اور دیگر پراجیکٹ ٹیم کے ارکان شامل تھے۔
اہم خبریں سے مزید