فرمان الہی
نماز کے اوقات
اسلام آباد ہائی کورٹ نے راستہ نہ دینے پر شہری کی گاڑی روک کر گارڈ سے تشدد کروانے کے معاملے میں تحصیلدار علی جاوید کو 26 فروری کو طلب کرلیا۔
اسلام آباد ہائی کورٹ کے چیف جسٹس سرفراز ڈوگر نے تحصیلدار کو آئندہ سماعت پر ذاتی حیثیت میں طلب کیا ہے۔
عدالت میں درخواست گزار نے موقف اختیار کیا تھا کہ ٹریفک جام کے باعث فوری راستہ نہ دینے پر گاڑی کو روکا، گارڈ نے تھپڑ مارے اور بدتمیزی کی۔
ان کا یہ بھی کہنا تھا کہ تحصیلدار نے اپنی پوزیشن کا غلط استعمال کرتے ہوئے سنگین نتائج کی دھمکیاں بھی دیں۔
درخواست گزار نے موقف اپنایا کہ تحصیلدار کا سڑک کنارے روک کر تضحیک آمیز رویہ اختیارات کا ناجائز استعمال ہے، چیف کمشنر اور ڈپٹی کمشنر کو تحصیلدار کیخلاف انضباطی کارروائی کا حکم دیا جائے۔
درخواست میں تحصیلدار علی جاوید، چیف کمشنر، ڈپٹی کمشنر اور ایس ایچ او تھانہ بنی گالہ کو فریق بنایا گیا ہے۔
عدالت عالیہ نے تحصیلدار علی جاوید کو پٹیشن پر شق وار جواب کیساتھ 26 فروری کو عدالت پیش ہونے کا حکم دے دیا۔
