فرمان الہی
نماز کے اوقات
اینڈوسونو گرافی(Endoscopic Ultrasound - EUS)ایک جدید طبّی ٹیکنالوجی ہے، جو اینڈو اسکوپی اور الٹرا ساؤنڈ کو یک جا کرتی ہے۔ اِس طریقۂ کار میں ایک خاص اینڈو اسکوپ استعمال کیا جاتا ہے، جس کے سرے پر ایک الٹرا ساؤنڈ پروب نصب ہوتا ہے۔
یہ ڈاکٹرز کو نظامِ ہاضمہ اور قریبی اعضاء(جیسے لبلبے، جگر، پِتّے اور لمف نوڈز) کی واضح اور تفصیلی تصاویر فراہم کرتا ہے۔ ای یو ایس نہ صرف تشخیص کے لیے مفید ہے، بلکہ اس کے ذریعے علاج معالجے میں بھی مدد ملتی ہے۔
ای یو ایس کا استعمال
تشخیصی مقاصد: ٭سرطان کی تشخیص:غذائی نالی، معدے، لبلبے، آنتوں اور پتّے کے سرطان کی تشخیص اور اسٹیجنگ۔٭پتّے اور لبلبے کے مسائل: پتھری، سوزش (پینکر یا ٹائٹس)یا رسولیوں کا پتا لگانا۔٭سِسٹ (Cyst) اور رسولیاں: لبلبے یا دیگر اعضاء میں گانٹھوں کا معائنہ۔٭لمف نوڈز کا جائزہ:سرطان کے پھیلاؤ کا اندازہ لگانا۔
علاج معالجے کے تحت: ای یو ایس صرف تشخیص ہی تک محدود نہیں، بلکہ اس کے ذریعے کم جراحی(Less Invasive) کے ذریعے علاج بھی کیا جاسکتا ہے۔(1)فائن نیڈل ایسپیریشن(FNA/FNB)٭گانٹھ یا رسولی سے نمونہ لینے کے لیے ایک باریک سوئی استعمال کی جاتی ہے۔ ٭یہ بائیوپسی سرطان یا انفیکشن کی تصدیق کرنے میں مدد دیتی ہے۔(2)فائن لیڈل انجیکشن(Fine Needle Injection) ٭لبلبے کی سسٹ یا رسولیوں میں ادویہ انجیکٹ کی جاتی ہیں۔٭درد یا انفیکشن کے علاج کے لیے استعمال ہوتا ہے۔
ای یو ایس گائیڈڈ ڈرینیج: ٭تھیلیوں سے پیپ یا پانی نکالنا۔٭پتّے یا لبلبے میں جمع ہونے والے سیال کو(پانی یا پیپ) نکالنے کے لیے٭انفیکشن یا سوزش کم کرنے میں مددگار
درد کا علاج: ٭لبلبے کے سرطان، پینکر یا ٹائٹس کی وجہ سے ہونے والے شدید درد کو کم کرنے کے لیے اعصاب بلاک کیے جاتے ہیں۔
معدے کا بائی پاس: ٭معدے اور چھوٹی آنت کے درمیان ایک نئی راہ بنائی جاتی ہے تاکہ کھانا گزر سکے۔
ای یو ایس کا طریقۂ کار
تیاری: ٭مریض کو چھے سے آٹھ گھنٹے تک خالی پیٹ رہنا ہوتا ہے۔٭بعض اوقات سکون آور دوا بھی دی جاتا ہے۔
عمل: ٭اینڈو اسکوپ کو منہ یا مقعد کے راستے داخل کیا جاتا ہے۔٭الٹراساؤنڈ کی مدد سے اعضاء کی تصاویر لی جاتی ہیں۔٭اگر علاج درکار ہو، تو سوئی یا دیگر اوزار استعمال کیے جاتے ہیں۔
عمل کے بعد: ٭مریض کو ایک سے دو گھنٹے آرام کرنا ہوتا ہے۔٭گھر جانے کے بعد معمول کی سرگرمیاں جاری رکھی جاسکتی ہیں۔
ای یو ایس کے فوائد
٭کم تکلیف: عام سرجری کے مقابلے میں کم درد اور کم پیچیدگیاں۔٭درستگی:الٹرا ساؤنڈ کی مدد سے درست تشخیص اور علاج۔٭تیز تر بحالیٔ صحت:مریض اُسی دن گھر جاسکتا ہے۔
ممکنہ پیچیدگیاں
ای یو ایس عام طور پر محفوظ ہے، لیکن کچھ ممکنہ پیچیدگیاں بھی ہوسکتی ہیں، جیسے:٭گلے میں خراش٭خون بہنا(شاذ و نادر)٭انفیکشن٭لبلبے میں سوزش (پینکر یاٹائٹس)
خلاصۂ گفتگو:
اینڈوسونو گرافی ایک انقلابی ٹیکنالوجی ہے، جو نہ صرف پیچیدہ امراض کی تشخیص میں مدد دیتی ہے بلکہ کم سے کم جراحی کے ساتھ علاج بھی ممکن بناتی ہے۔ اگر کسی عزیز کو نظامِ ہاضمہ سے متعلق کوئی مسئلہ ہو، تو ای یو ایس ایک بہترین تشخیصی اور علاج معالجے کا آپشن ہوسکتا ہے۔ اپنے ڈاکٹر سے مشورہ کریں اور بہتر صحت کے لیے جدید طبّی سہولتوں سے فائدہ اُٹھائیں۔ (مضمون نگار، ایمس اسپتال، حیدرآباد سے وابستہ ہیں)
