فرمان الہی
نماز کے اوقات
ورلڈ کپ آج کل اپنے عروج پر ہے ، جہاں حریف ٹیمیں ورلڈ کپ ٹرافی جیتنے کے لیے لڑ رہی ہیں وہیں اُن کی کچھ اپنی چپقلشیں بھی کھیل کے میدان میں چل رہی ہیں۔
لگتا ہے ساؤ تھ افریکا کے کھلاڑی کاگسو ربادہ آئی پی ایل کے دوران بھارتی کپتان ویرات کوہلی سے ہونے والی منہ ماری ابھی تک نہیں بھولے ہیں اسی لیے انہوں نے کوہلی کو ایک حالیہ انٹرویو میں غیر سنجیدہ (امیچور)کھلاڑی قرار دیا ہے ۔
غیر ملکی میڈیا رپورٹس کے مطابق ساؤتھ افریکا کے کھلاڑی ربادہ نےایک انٹرویو میں کوہلی سے متعلق سوال پر جواب دیتے ہوئے کہا ہے کہ ’’ کوہلی ایک غیر سنجیدہ انسان ہیں، وہ گالیاں دیتے ہیں مگر جواب میں گالیاں سننے کی اُن میں ہمت نہیں ہے، وہ کھیل کے دوران میدان میں ہر وقت غصے میں رہتے ہیں۔‘‘
24 سالہ ربادہ نےاپنی اور کوہلی کی آئی پی ایل میچ کے دوران ہونے والی منہ ماری سے متعلق بات کرتے ہوئے کہا کہ ’’ میں کھیل کے بارے میں سوچ رہا تھا، کوہلی نے آ کر مجھے مارا اور کچھ برے الفاظ بھی ادا کیے، جس پر میں نے بھی پلٹ کر جواب دیا تو وہ غصہ ہو گئے۔‘‘
ساؤتھ افریکا کے آ ل راؤنڈر کھلاڑی ربادہ نے مزید کہا کہ ویرات کوہلی میری سمجھ سے باہر انسان ہیں، شاید وہ اس لیے ایسا کرتے ہیں کہ یہ اُن کی عادت ہے، مگریہ میرے لئے انتہائی افسوس ناک تھا۔ وہ ایک غیر معمولی کھلاڑی ضرور ہیں لیکن اُنہیں اس بات کا غلط استعمال نہیں کر نا چاہیے۔
واضح رہے کہ ساؤتھ افریکا آئی سی سی ورلڈ کپ میں اپنے 2 میچز کھیل چکی ہے جبکہ بھارت 5 جون کو ساؤتھ افریکا کے مخالف اپنا پہلا میچ کھیلے گا۔
