پولیس ان ایکشن

10 نومبر ، 2019

نوشہرو فیروز سندھ کا اہم ضلع ہےجس کے پانچ اراکین سندھ اسمبلی میں ضلع کے عوام کی نمائندگی کرتے ہیں۔ مجموعی طور پر یہاں امن عامہ کی صورت حال صوبے کے دیگر اضلاع کی بہ نسبت بہتر ہے اور جرائم کی شرح اس ضلع میں خاصی کم ہے ۔بعض اوقات سماج دشمن عناصر ضلع میں اپنی سرگرمیاں شروع کرتے ہیں لیکن پولیس ان کی بیخ کردیتی ہے۔

چند ماہ قبل نوشہرو فیروز میں منشیات فروشوں نے سرگرمیاں شروع کی تھیں، پولیس نے مختلف علاقوں میں کارروائیاں کرتے ہوئے کئی افراد کو گرفتار کرکے بھاری مقدار میں منشیات بھی برآمدکرلی تھیں لیکن اس برائی کا مکمل طور سے خاتمہ نہیں ہوسکا تھا۔

ایس ایس پی ضلع نوشہروفیروز ڈاکٹر فاروق احمد تک منشیات فروشوں کی سرگرمیوں کے بارے میں ضلع کےمختلف علاقوں سے جب عوامی شکایات پہنچیں تو انہوں نےفوری طور سے ایکشن لیا اور پولیس کو جرائم پیشہ عناصر کی مکمل بیخ کنی اور منشیات کے خلاف بھرپور کارروائیوں کی ہدایات جاری کیں۔

ایس ایس پی کی سخت ہدایات پر پولیس کی جانب سے مختلف علاقوں میں کریک ڈاؤن شروع کیا گیا۔محبت ڈیرو پولیس نے خفیہ اطلاع ملنے پر آپریشن کرتے ہوئے خا نواہن کی حدود سے ضیاالدین شیخ سے چھینا گیا ٹریکٹر اور ٹرالی برآمد کرلی۔

گرفتارملزمان کے قبضے سے اسلحہ بھی برآمد کیا گیا، جن میں ایک کلاشنکوف، پستول ، اور 10 عدد رائونڈزشامل ہیں۔ پولیس نے اسلحہ اور ٹریکٹر ٹرالی اپنے قبضے میں لے ملزمان کو تھانے منتقل کیا جہاں ان کے خلاف دو الگ الگ مقدمات درج کیے گئے جن میں سے ایک ڈکیتی و رہزنی جب کہ دوسرا سندھ آرمز ایکٹ کے تحت درج کیا گیا ہے۔

منشیات کے خلاف تین مختلف کارروائیوں کے دوران پولیس نےانٹلی جنس معلومات کی بنیاد پر چار افراد کو گرفتار کرکےبھاری مقدار میں منشیات برآمد کرلیں۔پہلی کارروائی میں درس پولیس نے منشیات کے خفیہ اڈے پر چھاپہ مار کر دو ملزمان شوکت لانگاہ اور عاشق علی کوگرفتار کرکے 40لیٹر شراب برآمد کی جب کہ ملزم عاشق علی کے قبضے سے وہسکی شراب کی چھ مزید بوتلیں برآمد ہوئیں۔ پولیس نے شراب قبضے میں لے کر ملزمان کےخلاف مورو تھانے میں مقدمہ درج کرلیا ۔

دوسری کاروائی میں کنڈیارو پولیس نے کریک ڈاؤن کرتے ہوئے ایک منشیات فروش شفیق منگریو کو گرفتار کرکے اس کی تحویل سے دیسی شراب کی 20بوتلیں برآمد کرلیں۔ملزم کے خلاف کنڈیارو تھانے میں مقدمہ درج کرلیا گیاہے۔ تیسری کارروائی میں محراب پور پولیس نے خفیہ اطلاع پر کارروائی کرتے ہوئےایک منشیات فروش ملزم ندیم دایو کو گرفتار کرکے 16 لیٹر شراب برآمد کرلی۔

ملزم کے خلاف محراب پور تھانے میں مقدمہ درج کرلیا گیا جب کہ محراب پور پولیس کی دوسری کارروائی کے دوران منشیات فروش آصف علی چنہ کو گرفتار کیا گیا جس کے پاس سے آٹھ لیٹر شراب برآمدہوئی ۔ اسے تھانے منتقل کرکے اس کے خلاف منشیات ایکٹ کے تحت مقدمہ درج کرلیا گیا۔ لاکھاروڈ پولیس نےدو منشیات فروشوںاعجاز چنہ اور مختار کوکو گرفتار کرکے ان کے قبضے 15لیٹر دیسی شراب کے علاوہ اسلحہ بھی برآمد کیا۔

پھل تھانہ پولیس نے ایک کارروائی میں سکندر کھوسو نامی شخص کو گرفتار کرکے اس کے قبضے سے 1200گرام چرس برآمد کرلی جب کہ کنڈیارو پولیس نے منشیات فروش شمشاد گھانگھرو کو گرفتار کرکے اس کے قبضے سے 300 گرام چرس برآمد کی ۔ ٹھاروشاہ پولیس نے خفیہ اطلاع پہ کارروائی کرکے، ایک شخص کو شراب سمیت گرفتار کرلیا۔گرفتار ملزم حسین بلاول منگی کی تحویل سے دیسی شراب کی چار بوتیں برآمد ہوئیں۔

27اکتوبر کو انسانی ظلم و بربریت کا افسوس ناک واقعہ پیش آیا جس میں ایک دکاندار نے معصوم بچے کو بہیمانہ تشدد کا نشانہ بنا کر اس کی ٹانگ توڑ دی۔نمائندہ جنگ کو موصول ہونے والی تفصیلات کے مطابق ضلع نوشہرو فیروز کی تحصیل محراب پورمیں کپڑے کی دکان کے مالک مسعود چنہ کی دکان میں سے نقدی اور موبائل فون چوری ہوگیا۔ اس نے اس چوری کا الزام دکان میں ملازم 14سالہ لڑکے پر عائد کرتے ہوئے اسے تشدد کا نشانہ بنایا۔

مسعود چنہ نے لڑکے کو پکڑ کر چارپائی سے باندھ دیا اور اسے ڈنڈے سے پیٹنا شروع کردیا۔ تشدد کے دوران بچہ چیختا رہا، دکاندار سے فریاد کرتا رہا لیکن اس نے تشدد جاری رکھااور لڑکے کی ٹانگ توڑ دی۔تشدد کی فوٹیج جب سوشل میڈیا پر وائرل ہوئی تو ایس ایس پی نوشہروفیروز ڈاکٹر فاروق احمد نے واقعے کا فوری نوٹس لیتے ہوئے محراب پور پولیس کو ملزم کی گرفتاری کا حکم دیا۔ پولیس نے مسعود چنہ کو گرفتار کرکے تھانہ منتقل کردیا جب کہ زخمی بچے کو علاج کے لیے اسپتال میں داخل کرایا گیا ۔

تازہ ترین