غیرملکی فنڈنگ‘الیکشن کمیشن کا غیرمعینہ مدت تک سماعت ملتوی کرنے سے انکار

اسلام آباد(ٹی وی رپورٹ)الیکشن کمیشن نے غیرملکی فنڈنگ کیس میں عمران خان کی نا اہلی سے متعلق درخواست کی سماعت غیرمعینہ مدت تک کے لئے ملتوی کرنے کی درخواست مسترد کردی اورعمران خان سے درخواست پر 7 جون تک جواب طلب کر لیا،الیکشن کمیشن کا کہنا ہے کہ عمران خان کاجواب آنے کے بعدہی سماعت غیر معینہ مدت تک ملتوی کرنے کا فیصلہ کیا جائے گا۔دوران سماعت چیف الیکشن کمشنرنے عمران کے وکیل سے استفسا ر کیاکہ کیا آپ سپریم کورٹ میں جواب دے چکے ہیں آپ سے جو جواب مانگا ہے وہ جمع کرانے میں کیا حرج ہے؟۔ ممنوعہ ذرائع سے پارٹی کے لئے فنڈز لینے اور الیکشن کمیشن کے سامنے جھوٹا سرٹیفکیٹ جمع کرانے کے الزام پر عمران خان کی نااہلی کے لئے درخواست پر سماعت چیف الیکشن کمشنر کی سربراہی میں5رکنی بنچ نے سماعت کی ۔ درخواست گزار ہاشم علی بھٹہ کی جانب سے مؤقف اختیار کیا گیا تھا کہ عمران خان نے 2010 سے 2015 تک کے جو پارٹی کے اثاثہ جات جمع کرائے تھے اس میں انہوں نے بیان دیا تھا کہ ہم نے کوئی بھی فنڈ نہیں لیا۔عمران خان کے وکیل شرافت چوہدری نے جواب جمع نہیں کرایا اور سماعت ملتوی کرنے کی درخواست دیتے ہوئے استدعا کی کہ عمران خان کے خلاف سپریم کورٹ میں بھی حنیف عباسی کی جانب سے اسی نوعیت کی درخواست دائر کی گئی ہے۔ چیف الیکشن کمشنرسردار رضاخان نے استفسار کیا کہ کیا آپ سپریم کورٹ میں جواب دے چکے ہیں آپ سے جو جواب مانگا ہے وہ جمع کرانے میں کیا حرج ہے؟وکیل عمران خان نے کہا کہ سپریم کورٹ میں انہی نکات پر دائر پٹیشن کا جواب دے چکے ہیں اور عمران خان نے 2010 سے 2015 تک کا سر ٹیفکیٹ دیا ہے جس میں بتایا گیا ہے کہ ہم نے ممنوعہ ذرائع سے فنڈز نہیں لئے۔الیکشن کمیشن نے غیرمعینہ مدت تک سماعت ملتوی کرنے کی عمران خان کی درخواست مسترد کردی اور عمران خان کو 7 جون تک جواب جمع کرانے کا حکم دے دیا۔