قائد حزب اختلاف شہباز شریف نے کہا ہے کہ سینئر صحافی محسن بیگ کی گرفتاری افسوس ناک اور شرم ناک ہے، سوال کرنے والوں سے نمٹنا بدترین حماقت اور فسطائیت ہے۔
سابق صدر آصف زرداری نے کہا کہ کسی میں تنقید سننے کا حوصلہ نہیں تو سیاست چھوڑ دے، محسن بیگ کو جس انداز میں گرفتار کیا گیا وہ قانون سے ماورا ہے۔
علاوہ ازیں پیپلزپارٹی کے چیئرمین بلاول بھٹو زرداری نے کہا ہے کہ اہل خانہ کے سامنے صحافی محسن بیگ کو گھسیٹ کر ایسے گرفتار کیا گیا جیسے وہ دہشت گرد ہوں۔
بلاول بھٹو زرداری نے محسن بیگ کی فوری رہائی کا مطالبہ کیا ہے۔
ادھر پی ڈی ایم کے ترجمان حافظ حمد اللّٰہ کا کہنا ہے کہ گھر پر چھاپا چادر اور چار دیواری کے تقدس کی توہین اور پامالی ہے، محسن بیگ پر تشدد آزاد صحافت پر تشدد ہے۔
انہوں نے کہا کہ حکومتی پالیسیوں پر تنقید کرنا محسن بیگ کا جرم ہے، عمران خان آئے روز مخالفین کو تشدد اور انتقام کا نشانہ بناتے ہوئے آج کا ہٹلر ثابت ہوچکے ہیں۔