وزیراعظم شہباز شریف سے متحدہ عرب امارات کے معاشی وفد نے لاہور میں ملاقات کی، جس میں دو طرفہ تجارت، توانائی، انفرااسٹرکچر اور پٹرولیم سمیت دیگر شعبوں میں تعاون مضبوط بنانے پر اتفاق کیا گیا۔
اعلامیہ کے مطابق وزیر اعظم شہباز شریف نے وفد سے گفتگو کرتے ہوئے کہا کہ حکومت پاکستان متحدہ عرب امارات کے ساتھ برادرانہ تعلقات کو انتہائی اہمیت دیتی ہے۔
انہوں نے کہا کہ پاکستان معاشی محاذ پر ان تعلقات کو بلندیوں کی ایک نئی سطح پر لےجانے کا خواہشمند ہے۔
وزیر اعظم نے کہا کہ عید الفطر کی تعطیلات میں وفد کی آمد یو اے ای حکومت کی پاکستان میں سرمایہ کاری میں دلچسپی کا مظہر ہے۔
شہباز شریف نے کہا کہ پاکستان امارات کے بھائیوں کی پاکستان میں سرمایہ کاری میں دلچسپی کا خیر مقدم کرتا ہے۔